Mizoram Secondary School Teachers Association (MISSTA) chuan, an thil phût hrang hrangte tihhlawhtlin a nih loh avangin kumina pawl 9 promotion exam result tihchhuah loh an tum a; an thil phûtte chu tihlawhtling thuai turin Mizoram sorkar an ngen tih chanchinbumite an hrilh a. Sorkara an thil phut hi anmahni (MISSTA) lam thlirna atang chuan thil awm tak tak vek a nih a rinawm. Amaherawhchu, zirlaite tawrh theihna tur zawnga nawrhna huaihawt an tum erawh hi chu thil dik niin a lang lo. MISSTA hian an tum dan chuan, sorkarin an thil phut a tihhlawhtlinsak lo a nih chuan kum 2013-14 Class IX promotion exam result tihchhuah rih loh an tum a, kum 2013-14 HSLC practical exam (science, H.Sc, IT, etc) conduct loh an tum bakah, HSLC Examination 2014 paper reng reng MISSTA member ten en (examine) loh nise an ti bawk a ni awm e. Heng hi zirlai leh zirlai nu leh pate tan chuan lungngaihpui tham a tling hial mai thei! Mizorama zirna kalphung chungchangah sorkarin theihtawp chhuah thin bawk mahse, lungawi an awm laiin lungawi lo engemawzat an awm ve reng zel bawk a. Thenkhat chu an service chungchang leh an dinhmun thu-hla te a ni a, thenkhat erawh chu hlawh chungchangte a ni. Sorkar hnathawk dang zingah pawh lungawi leh lungawi lo hi an kat nuk reng thin bawk. Sorkar hnathawk dangte ang lo takin zirtirtute hian hlutna an nei a, chu chu, mihring hman tlak chherchhuak theitu an nihna hi a ni a, ngaihsak leh duat pawh an phu khawp mai. Chutih rualin, zirtirtute hian duat leh ngaihsak an phu rual hian, an kova mawhphurhna sang tak awm hi an hlen chhuak em tih an inenfiah ve fo erawh a tul hle ang. Zirtirtuten engemaw sorkar atanga phut a, an zirlaite tawrhna thlen zawnga thiltih hi an koh eih tum leh an thil phut tihlawhtling theitu sorkarin eng vakah a ngai lo thei a, a ngaipawimawh viau thei bawk. A tuartu ber zawk erawh chu zirlaite leh an nu leh pate an ni lo thei lo. Kumpui lingletin, kawla ni chhuak chhiarin, thenkhat chuan neihthinglung khawng takmeuhin an fate lehkha an zirtir a, chutih laia, zirtirtu lam atanga zirlaiten harsatna an tawh chuan zirlai mai ni lo, nu leh pa thlenga tawrhna a thleng thei tih hriat a tha a, sorkara thil phut tihhlawhtlin a nih theihna tura zirlai leh an nu leh pate tawrhna thlen lo zawnga lungawilohna lantir dan kawngte pawh dap mai a tha in a rinawm. Mizoram sorkar pawhin ngaihtuahna fim tak hmanga zirtirtute lungawilohna leh an thil phutte ngaihthlak kawngah hma a lak a tul hle. Congress ministry term hmasa, 2008-2013 chhungin cheng tamtak sengin Education Reforms Commission din a ni a, he report zirchianga atanga tih hmasak tulte thurchhuak tur Expert Committee din niin, hei pawh hian sorkarah an report an thehlut daih tawh a. Mahse, a tak taka he Commission report hman a nih awm erawh hriat tur a la awm meuh lo! Mithiam tak tak, sum tamtak senga rawiha, hman mumal loh tur report chhahpui siam hian awmzia a nei lo a, Zoram zirna pawhin a sawtpui mawh hle ang tih a rin theih. Chuvangin, Mizoram zirna siamtha tur hian tih tak takna, vei tak takna a awm a ngai a. Chutiang bawkin, zirtirtute pawhin an mawhphurhna an chiang tur a ni bawk.