Aizawl May 1, 2023: Vawiin atang hian Zoram Medical College atanga MBBS zirchhuak zirlai 68 te bakah Foreign atanga zirchhuak zirlai 6 te chuan ZMC-ah Internship an ti tan. He mi puala Internship Orientation Programme chu Health Minister Dr R. Lalthangliana chuan a hmanpui.

ZMC Lecture Hall-a hun hmanah Health Minister chuan ZMC zirlai ten Internship an tan thei tur chu thil chhinchhiahtlak tak, Mizoramin mellung a phun thar pawimawh tak a ni, a ti a. Hripui len nasat laia Dedicated Covid Hospital-a ZMC puan a nih avanga zirlaite harsatna an tawh pawhin kian lam a pan mek avangin lawmawm a tih thu sawiin, ZMC-a PG Course hawn a nih theih nan leh India rama Medical College tha ber pawl a nih theih nana tan lak puiah kalkhawmte chu a sawm nghal bawk a ni.

Kum zabi sawmhnih leh pakhatna chu tumruhna leh chhelna hmanga hmachhawn ngai a nih thu sawiin Minister chuan zirlaite chu an thlen chin duhtawk mai lova kal zel turin a chah a. Mizoram-in Doctor tam tak a mamawh thu sawiin Post Graduate mai ni lo, Super Speciality thlenga zir tum turin zirlaite a fuih bawk.

ZMC-a internship neiturte hian May ni 3, 2023 (nilaini) thleng orientation programme hi an nei ang a, internship hi kum khat chhung neih tur niin April ni 30, 2024 ah an zo ang.