Aizawl : Kum 2018 tawp lama Zoram Medical College-a thawk tura lak nurse 70 te chuan ZMC-ah hna an zawm vek lo a, chutih rualin Covid-19 avangin thawktute indaih lo viau mah se, volunteer a nurse thawk tur lak pawh tih fel a la ni chuang lo.

Kum 2019 khan ZMC a thawk tur nurse hi Mizoram sawrkar chuan an la a, Mizoram hmun hrang hranga damdawi in a lo thawk tawh, a nghet lova lak te chu hemi tum hnah lakah hian dah ngheh an ni. Hetih lai hian ZMC-ah hian dah nghal an ni lo a, an lo thawh lailawkna district hospital, PHC leh CHC-ah te an thawk chhunzawm hlawm a, hripui a len hnuah pawh an thawhna hmunah indaih lohna a nasat tho avangin ZMC lamah thawk tura lakchhuah an ni lo.

Medical Operational Team (MOT) Chairman leh Health & Family Board Vice Chairman Dr. ZR Thiamsanga chuan ZMC a thawk tura lak nurse 70 chungchang hi sawiin, "Ni e, nurse kha lak a ni ngei a, khatih hunlai khan ZMC-ah khan an thawh tur a awm tam lo a, an awmnaah khan an awm chhunzawm a. Hospital tin hi indaih lohna a nasa em em a, hripui a len hnuah phei chuan a zual a, lakchhuah ngawt theih an ni lo. State sawrkarin sum a senna te vek tho an ni a, a tul angin sawrkarin a dah lo thei lo a ni," tiin ZALEN a hrilh.

ZMC a thawk tur nurse lak te hi National Health Mission (NHM) hnuaia thawk thin, sawrkar hna thawk nghet la ni lo zinga a senior atanga lak an ni. Heng nurse an lak ho te hian ZMC atangin hlawh pawh an la vek tawh niin, ZALEN chuan thu a dawng. NHM hian ZMC-a thawk tur a ngheta an lak nurse te aiawh tur hi an lak tawh leh tawh loh chungchangah NHM Mission Director Eric Zomawia chuan a tir lamah kha chuan lak an neih thu a sawi a, tunah bik chuan NHM-ah hian hna ruak a awm loh thu a sawi. 

ZMC-ah hian Covid-19 thawh hmasak tum khan volunteer nurse engemaw zat lak an ni a, hri a reh lailawk lai khan ban zui leh an ni hlawm a, tun hnai hian he hmuna thawk tur hi lak turin ruahmanna siam a ni. Volunteer a lo thawk tawh nurse te kha hlawh an pe tha tawk lo niin sawi a ni a, September - December, 2020 hlawh hi December, 2020-ah a hlawma pe in, January 2021 phei hi chu April, 2021 khan an pe fel chiah niin ZALEN thudawnna chuan a sawi a, volunteer nurse anga thawk te hian thawh leh an chak tawh lo niin ZALEN an hrilh. 

ZMC a thawk tur hi Dr. Thiamsanga chuan tunah hi chuan lak fel an la nih loh thu a sawi a, chutih rualin Zirtawpni a an thutkhawmnaah an hlawh chu tihsan tura an rel thu a sawi. "ZMC-a volunteer nurse te hi thla khata Rs. 22,000 hlawh tura tih zet a nih hnuah thawh khat naah khan Rs. 18,000 hlawh tir an ni a, tunah chuan thla khata Rs. 22,000 hlawh turin kan han rel a, min pawm sak turah kan ngai," tiin a sawi.