Aizawl June 15, 2023 : Indegenous Tribal Leaders' Forum (ITTLF) chuan Coordination Committee on Manipur Integrity (COCOMI) ten June 14, 2023-a thuchhuah an siama Kangpokpi district chhunga Kuki Zo khua - H. Khopibung, Khamenlok, Chullouphai, P. Phainom, Aigejang, Thambol, Jordanphai, Songjang leh Govajang-a inbeihna a thi tualchhung mi anga Meitei ten an tarlan chu, dawt niin an sawi.

Indegenous Tribal Leaders' Forum (ITTLF) te chuan ni thum kalta chhunga inbeihna hmun chu Google map atangin awlsam taka en theih reng a ni tih an sawi a, thi an sawi te chu Kuki-Zo khua te awmna hnai ber Meitei chenna chu kilometre khat-a hlaah awm a ni an ti. "Heng Meitei tualchhungmi te hi engvangin nge Kuki-Zo khuaah te hian an thih ngawt?' tih hi zawhna a ni.  ITTLF chuan "Finfiahna awlsam tak chu tribal khua te chhum lo chat lova an run thin-ah hian an inrawlh ve a ni mai, tih zawng hi a ni. Village Defence Volunteer te hian an khua run tum te laka lo invenna bak tih theih an nei lo," an ti.

June 7, 2023 khan COCOMI te chuan 'Chin Kuki Narco terrorism' tiin Kuki-Zo te lakah hian Indo an lo puang tawh. Hei hian Meitei mipui te chu na taka Kuki-Zo te an demna tura chief of Meitei Leepun Pramot Singh-a'n national media lama hma a lakna nia an ngaih thu an sawi. Hei hian tualchhung mi te chu pawn lam mi anga an chhal te laka duh duha che turin phalna a pe angin an ngai tih an sawi.

Central Armed Force te chuan a tulna hmun a zirin remna siam tumin Meitei leh Kuki-Zo inkarah theihtawp an chhuah an ti. Amaherawhchu, Meitei, a sang tel tak meuh te chuan an hmeichhia (Meira Paibis) te hmachhuanin central force te hi Meitei ten an beih khua-a buaina te hmachhawn thei lo turin harsatna an siam a ni, an ti.

Vawiin hi Union Home Minister Amit Shah-a'n inremna atana  Manipur a thlen atanga a ni 15-na chiah a ni. Union Minister ngenna leh beiseina hian Kuki-Zo khua te in-beihna ti a tawp lo. Tribal te chuan chi leh chi inthlairna a thlen chhung leh chibil zawnga Kuki-Zo te laka hmalatu te an chet chhung chu an him loh tur thu an sawi. 

ITLF te chuan KUKI-Zo te Meitei Silai keng (Meitei militants) ten an run reng na laka an himna turin venhimna an mamawh tih an sawi a, ram chhunga remna leh muanna a thlen thuai theihna turin an state chhunga President Rule hman a ngai tih thuchhuah an siamah an tarlang.

Kuki Zo tribal te hian Manipur atangin inrelbawlna hran an mamawh tih an tarlang a, hei hi Manipur atanga inrunna awm reng laka tribal te himna leh venhimna tur an ti a, chu chu remna tluantling a awm theihna tur niin an sawi.