Aizawl February 18, 2024 : Tun hnaia din, Zo Puakphur (Mutia Agency) hruaitute chuan Mizoram a hnathawhna kawng hrang hrangah hnam dang an inbun nghet hle tawh niin an sawi a, an pawlah member 111 an inziak lut tawh tih an sawi.

ZALEN zawhna chhangin Zo Puakphur (Mutia Agency) hruaitute chuan, a bikin Aizawla mutia hna hi Mizo thalaiten thawh ve an duh tawh a; mahse, hnam dang an lo thawk nghet tawh lutuk a, luahlan an harsa niin an sawi.

“Pawl angin hna kan zawng a, thawh dan tur ruahmanna kan siam a, mi taima leh fel tak tak Mizo thalai an lo tam,” an ti.

“Hnathawhna kawng hrang hrangah hnam dang an lo inbun thuk nghet lutuk tawh a, an hlawh a tha a, an taima bawk si a, thawh hreh an nei si lo, Mizo thalaite kan tan a ngai. Hnam dangte kuta kan pawisa luangrual hi a tam lutuk,” an ti bawk.

Kan thalaite'n hna an duh thu te, thawh tur pawh an duh thu te, chutihrualin, anmahni a an fight hleih theih loh thu te an sawi a, thalaite hnathawh tur kaihhruai/kawhmuhna kawng lamah tan lak a ngai hle niin an sawi.

Zo Puakphur (Mutia Agency) hi tun February 1 khan din niin, tun dinhmun ah member 111 an inziak lut tawh a, hmeichhia pawh an tel nual a. Mizo thalaiten mutia lama eizawnna an neih theih nan leh hnam humhin nan Zo Puakphur (Mutia Agency) hi din a ni.