ZALEN September 27, 2026: GAC report chuan UD&PA Department-in consultant/contractor chu a duhsak hle a, chu chuan dan ding lai a bawhchhiat bakah Zodin Aizawla Multi-Level Car Parking cum Multi-Utility Centre saknaa expenditure aia sang hman a nih avangin Rs. vaibelchhe 0.99 pek belh a ngaih phah a. He project tihkhawtlai avang hian sum hman tur Rs. vaibelchhe 8.06 a khaihlak niin a tar lang.

August 27, 2026-a Mizoram Legislative Assembly-a pharh Comptroller & Auditor General (VAG) of India report tarlan danin Finance Department Office Memorandum, Government of Mizoram, clause 1.3-in tar lan angin eng department pawhin consultant a chhawr duh chuan hna thawh tan hmain finance department hnenah phalna lak hmasak tur a ni a. Department-in September 8, 2016-a notification a chhuah clause-4 ah chuan detailed project report (DPR) buaipui tur firm thlan chuan DPR anmahni chungchang buaipuinaah an thawk thei lo.

Test check (November-December, 2021) a UD&PA director-a record-in a tar lanah department-in October 12, 2017-ah Multi-Level Car Parking cum Multi-Utility Centre, Zodinah sak phalna leh sakna tur pawisa Rs. vaibelchhe 25 chu New Economic Development Programme (NEDP) hnuaiah a dawng tih hriat a ni a. He project-ah hian heng dan bawhchhiatna leh hlawhtlin lohna te hi hmuh a ni.

(a) Consultant/Contractor hnenah duhsakna tam tak pek a ni- Bihchiannaah director, UD&PA chuan March 15, 2016-ah Multi-Level Car Parking cum Multi-Utility Centre sak tan dan tur leh ruangam - Preliminary Architectural Design chu state sawrkar hnenah a hlan a. Department chuan April 25, 2016-ah notice siamin Mizorama architect-te chu competition-a tel tura sawmna a tichhuak a, chutah chuan M/s JMT Architects, Zarkawt chu a sakna tura Preliminary Architectural Design competition-a chaka puan an ni a, lawmman atan Rs. nuai khat pek an ni. 

Hemi hnuah hian department chuan consultant sawmna Expression of Interest siam lo leh finance department hnenah phalna la loin M/s JMT Architects te chu Multi-Level Car Parking cum Multi-Utility Centre sakna DPR siam turin leh consultancy service pe turin a vaiin Rs. nuai 45-in inremsiamna Memorandum of Understanding (MoU) an ziak a. Hei bakah hian department hian inviting tender siam lo leh finance department hnenah phalna la loin he consultant firm hnenah hian robotic car parking system Rs. vaibelchhe 8.95 hu chu siam turin phalna a pe bawk a. Department-in consultancy project leh robotic car parking system sak phalna a pek hian dan bawhchhiain induhsakna a lang chiang a ni.

(b) Robotic car parking siamnaah sum ruahman aia tam hman avangin Rs. vaibelchhe 0.99 hman belh a ngaih phah - JMT Architects hian installation of robotic car lifts atan rate chu car pakhatah Rs. vaibelchhe 7.96 ni turin leh park theih zat, 113 awm turin a vaiin Rs. vaibelchhe 8.99 ni turin DPR a siam a. Hei bakah hian consultant chuan department hnenah automated car parking system siam nan Precision Automation & Robotics Inida Ltd. (PARI), Maharashtra chu work order pe turin a ngen a. Department hian hna hi thla 36 chhungin (September 21, 2021-ah) zo turin a ti a ni.

JMT Architects chuan PARI hnenah robotic car parking system 113 chu lei ta loin June ni 10, 2019 ah hmanrua (mechanical parking equipment) 100 chu rate sang zawk, parking equipment pakhat zelah cheng nuai 8.95, a vaiin cheng vaibelchhe 8.95e chu Tianjin Zhengda General Steel Pipe Technology Co. Ltd, Tianjin, China hnen atangin a lei a, hei hi a tira car parking system lei tur chungchang, model dang daih lei leh dawr dang daiha lei hi phalna pawh a awm lo a, a chhan hrilhfiahna pawh a awm lo a ni.

 Department chuan JMT hian DPR an siamtha in hei hi February ni 10, 2022 ah dawng a. Hei hi work order an hmuh hnu kum 3 leh thla 2 hnuah hmuh chauh a ni a, bungrua an lei hnuah kum 2 leh thla 8 leh hna thawh zawh hun an ruat hnuah thla 4 na a ni. He DPR siamthat hi a hnu daih August ni 3,2022 ah pawm a ni a, chuti chu ruahman aia tam vaibelchhe 0.99 chu pek belh a ngai ta a ni.  

(c) Robotic car parking install-na atan cheng vaibelchhe 8.06 senga siam hi hman theihin a awm lo- Department leh JMT Architects te inremsiamna Clause-2.11 ah hian robotic car system installation chu hmanrua te an dawn hnu thla thum atanga thla li chhungin zawh tur anih bakah design lawk angin work order pek hnu thla 36 chhunga zawh fel (September ni 21,2021) tur a ni. Robotic car parking system hi hmanrua leh installation zawh ni tawh mah se, he system hi power supply mumal awm loh avangin test theih a ni ta lova. He rokhawlhna hi ruahmanna mumal Department in duan loh vang niin CAG chuan a tarlang a. Hei vang hian kum 5 leh thla 5 chhung hman tangkai theih a ni lo a ni.

Heng report te hi Department leh sawrkar hnenah thlen a ni a. Sawrkar chuan Department staff te chuan draft DPR chu lo submit palhin, hetah hian robotic car lift chu car 113 tan car pakhat zelah Rs. nuai 95 man a ni tih a inziak a, mahse an DPR pawm takah chuan robotic car lift chu car 100 park na tur, car pakhat zelah Rs. nuai 8.95 man a ni a, pawisa hman belhna a awm lo a ni an ti. Amaherawhchu, sawrkar chhanna hi dik thei a ni lo niin CAG chuan a tarlang a, draft DPR mai a ni lo. DPR siamthat hi consultant/ Contractor chuan February 2022 ah submit chuah niin, hei hi Audit hnu thla 2 naah leh hnathawh zawh hun ruata a thla li naah submit a ni. Approval (pawmna) hi tlai khaw hnuah August 2022 ah sawrkar hnen atanga hmuh a ni a, chu chu parking bungrua dawn hnu kum 3 liam hnuah a ni tih a tarlang bawk.

Audit chuan sawrkar dan bawhchhiatna nia a tarlan te chu

(i) JMT Architects te Cansultant anga chhawr

(ii) robotic car parking system install na tura firm ngai tho contract pek

(iii) Consultancy services hlawh (45 lakh) pek leh open competition awm loa robotic parking system siam tura chhawr nghalna.