Zodintluanga RT-PCR pek hmang hrih loin Quattro Truenat dah belh dawn

Admin - Jun 02, 2021

Director chuan Thorang bialtu MLA khawl pek chu pressure cooker in pek, bawlhlo la lei ngai ang a nih thu sawiin, a pek dan pawh thil pek dan pangngai a nih loh thu a sawi

Aizawl, June 02: Lunglei Hospital tana RT-PCR khawl Zodintluanga, MLA in sawrkar hnena a pek chu a hmun hma a remchan loh avangin hman a nih loh tur thu Hospital & Medical Education Director Dr Lalhmangaihi chuan vawiin khan YMA Sub headquarters Lunglei hall-ah press mite a hrilh a, Truenat khawl dah belh a nih nih tur thu a puang bawk.
 
Director chuan press mite hnenah, "Zodintluanga RT-PCR pek chu hman a ni dawn lo a, Truenat khawl dahbelh a nih tur thu puang tura chah ka ni a. Nimin lamah Health Minister hoin kan thukhawm a, sawrkar chuan Lunglei hmasawnna chu a vei tak zet a ni," tiin a sawi a. Press mite zawhna chhangin RT-PCR dahna hmun tur chu awm mahse a luhna leh chhuahna a hran siam ngai a ni a, a hmun hma a remchang lo a, khawl bun tur hian thil tam tak a ken tela, Air conditioner te, bathroom hran thlengin a chhawm tel a, tun dinhmunah chuan kan tlin hrih mai lo a ni," tiin Director chuan a sawi a. Director chuan Thorang bialtu MLA khawl pek chu pressure cooker in pek bawlhlo la lei ngai ang a nih thu sawiin a pek dan pawh thil pek dan pangngai a nih loh thu a sawi bawk.
 
Civil Hospital Lunglei ah Laboratory block changtlung zawk din a nihna turin NEC lamah DPR thehluh a ni mek a, crore 7.8 senna tur laboratory phuisui tak din tum a ni a, D.O Letter hmangin a changtu minister chuan NEC ah a ziah tawh thu a sawi bawk a ni. ZALEN in 'MLA Zodintluanga'n khawl a pek chu engtia tih tur nge ni ta ang?' tia a zawhna chhangin Laboratory chhawng khatah chuan MLA Zodintluanga RT-PCR chu seng luh a nih tur thu Director chuan a sawi a, chumi avang chuan "Working condition in awm se tia lo enfiah turin kan inti tawh bawk a ni," tiin a chhang a ni.
 
Dr. Lalhmangaihi chuan Chief Minister nena an inbiakna a sawi a, MLA development fund peih tep a nih tawh thu sawiin a tul a nih chuan MLA fund atangin Lunglei tan Truenat Quattro chu mamawh zat ang lei belh turin CM in a hrilh thu a sawi bawk a ni.
Share now