ZALEN December 5, 2024 : ZORO General Headquarters chuan vawiin khan Zo Indigenous Indentity Card Mizoram State Legislative Assembly Speaker room-ah tlangzarhna hun an hmang a. Zo Indigenous Indentity Card hi Lalbiakzama Mizoram State Legislative Assembly Speaker in a tlangzarh a ni.

Zo Indigenous Indentity Card sawifiahtu L. Ramdinliana Renthlei chuan, “Zo Indigenous Indentity Card hi UN thupuan - UN Declarations on the rights of Indigenous Peoples in kan dikna chanvo min pek Tualto hnamte a bik takin khawvel sawrkar ramri khamin a thendarh te chu an inkal pawhin an inlaichinna tinghet tur leh intanpui tawn a tul pawhin an intanpui ang a, sakhaw thil leh khawtlang thil, ei leh bar leh politics-ah te anmahni mi leh sa te nen inpawh a, inpawlho theihna dikna chanvo an nei, min tih angin kan dikna chanvo min siamsak kan zawmna tur atan a tangkai dawn a ni."

"Zo Indigenous Indentity Card hian kan nihna a ti chiang dawn a, ID nei apiangte chu khawvel ramri khamin a then Zofate India, Burma leh Bangladesh a awmte zalen taka inkalpawh a ti awl sam thei ang. Zo Indigenous ID hian Zofate hi UNO hnuaia Indigenous Peoples Organisation (IPO) kan ni tih ti lang chiang tu a ni a, Indigenous Peoples kan nih anga UNO in chanvo min pek te kan chan theih phah dawn a ni,” a ti.

ZORO in Zo Indigenous ID a siam hi UNO hriattir a ni dawn a. Tin, India Sawrkar, Burma Sawrkar leh Bangladesh sawrkar hriattrir a ni ang. India sawrkar lehkha pek hi Mizoram, Manipur, Assam leh Tripura sawrkar a copy pek a ni bawk ang. Zo Indigenous ID hi a siam man Rs.100 a ni a, a form hi ZORO office-ah lei tur a ni a, a form kan fillup zawh a thlalak nen thehluh tur a ni. ZORO chuan Zofate zawng zawngin Zo Indigenous ID hi siam vek turin a sawm nghal a ni.