Aizawl; Chief Minister Zoramthanga chuan Zokhawsang rama Assam Rifles awmna hmun hawng turin Union Home Minister Amit Shah chuan November thla hian Mizoram rawn tlawh a tum tih a sawi.

Nimin khan Chief Minister’s Conference Hall-ah chanchinbumite kawma he thu hi sawiin chief minister chuan Zokhawsanga Assam Rifles awmna tur chu sak zawh tawh a ni tih union home minister chu a hrilh tih sawiin an awmna hmun thar hi hawng turin a sawm niin a sawi a. Home minister pawhin lo rem tiin a phur hle tih a sawi a, a hun leh ni tur tak erawh la hriattir leh tur niin a sawi a. Hetia AR te awmna tur hawn a nih chuan an luah zui nghal mai turah an ngai tih a sawi bawk.

Chief minister chuan tun hnai Delhi a zin tumin India president, prime minister leh mi pawimawh hrang hrang a hmuhna ah Burma buai chin fel chungchang a sawi tih a sawi bawk a. “Myanmar ram buaina ching fel tur hian India sawrkar tanpuina hi a pawimawh ber leh kawng awmchhun a ni a. India sawrkar chu pa chan changa bul tanpui turin ka ngen a. Mi pawimawh ka hmuh te hian an lo ngai pawi mawh vek a ni,” a ti.

Zawh belhna chhangin chief minister chuan, “Myanmar a hel pawl hrang hrangte hian democracy hi an tum ber a ni lo a, federal government-ah an lungawi vek a. Tuna an buaina chin fel nan khian sipai sawrkar leh hnam hrang hrang hel pawl (ethnic arm group) te khian inremna an neih theih chuan NUG pawhin a pawm niin a lang a. Chuvangin, remna neih theih niin ka hria a ni,” a ti bawk.

Chief minister chuan Union Health Minister Mansukh Mandaviya hnenah Zoram Medical College chu sawrkar laipui enkawl turin a thlen tih a sawi a. “Mizoram sawrkar enkawl a nih chuan sum leh paiah kan harsat bakah thawktu tha leh thiam kan nei thei lo a. Central enkawl anih chuan mi thiamte pawhin thawh an châk zawk dawn a, chuvangin min laksak turin kan ngen a. Union minister hian a hlawhtlin ngei theih nan theihtawpa hmalak a tum thu min hrilh a ni,” a ti a. Zemabawk cancer damdawi ina khawl leina tur Rs. vaibelchhe 10 chu a pek tur thu a sawi nghal niin Chief minister hian a sawi bawk.

Union HRD Minister hnenah Lunglei a Mizoram University Southern campus dah chungchang a sawipui tih sawiin Minister hian a hlawhtlin nan theihtawpa hmalak pui a tum niin a sawi a. Asian Development Bank hotute a kawmna ah health care sum atan vaibelchhe 1000 an dil leh sawrkar laipui pawhin an remtih vek tawh chu pe chhuak rang turin a ngen niin a sawi a. He sum hi central in vbc 780 an rulh tur anih thu leh Mizoram sawrkar rulh tur chu vbc 280 anih thu a sawi.

Chief Minister Zoramthanga chuan Assam Chief Minister nen an inkawm tih sawiin ramri buai chinfelna tura Minister te leh official te hma lo lakna chu lawmawm an tih thu an sawi a. "Inremna siam ngei tura inbiakna hi neih zui zel nise, a tul angin Chief Minister pawh inhmuh zel ni se kan ti a. Kuhva chungchangah dan lova Myanmar atanga kuhva ro lo lut te chu dan chhunzawm zel nise, chutih laiin tualchhung tharchhuah kuhva chu a hralh leh phurh velah harsatna awm lo se tiin kan sawi a ni," a ti. Chief Minister chuan MNF returnee te insak tanpuina pawh Prime Minister leh Minister dangte bulah a sawipui niin Press mite a hrilh bawk.

Press mite a kawmna ah hian Chief Minister hi Deputy Chief Minister Tawnluia leh I&PR Minister Lalruatkima ten an tawiawm a ni.