ZALEN September 29, 2026 : Zokhawthar Branch YMA in thlanlunga Mizo tawng nilo a thu inziak awmte chawlhkar khat chhunga siam tha tura thuchhuah an siam chu sut leh turin Central Young Lai Association (CYLA) chuan an ngen.

CYLA chuan thuchhuah siamin, Zokhawthar thlanmuala thlanlungah Mizo tawng ni lo anga tarlan chu ‘Lai tawng’ a nih avangin an ngaih thutak thu an sawi a. Mizoramah hnam hrang hrang, Lusei, Lai, Mara, Hmar, Paite leh hnam dangte an chengho a, tawng hrang hrang an nei vek bawk. Tawng thenkhat chu hriatzui tur awm tawh lovin a ral mek bawk a ni an ti.

Lungrual tak leh inngeih taka khawsakho hi CYLA duhdan pawh a ni a, kan unau leh tha taka kan thawhpui CYMA leh MTP, Gen. Hqrs te duhdan pawh a nih thu an tarlang.

Zohnahthlak hnam peng hrang hrangte hi tun aia nasa zawka kan inpumkhat theih nana NGO leh pawl hrang hrangin hma kan lak mek laia impumkhatna tichhe thei zawnga hetianga hmalakna leh thuchhuah a awm hi Central YLA chuan pawi a ti takzet zet a, hetiang hmalakna leh thuchhuah hi sut leh turin kan ngenin kan beisei tlat a ni an ti.

CYLA chuan, ‘Mizo’ tihin akhung leh ‘zohnahthlak’ tihin a khung zingah hian eng hnamte leh eng tawngte hi nge telh leh khung a ni tih hi kan zawhna a ni? India rama cheng, India khua leh tuite hian kan hnam tawnga tawng leh ziak theihna dikna chanvo hi kan nei theuh a, chuvang chuan innekchep zawnga hmalakna

 chu tha an tih loh thu an sawi.