Zopa tharchhuah buhfai lei kan tum : Supply Minister

zalenxhg - Feb 01, 2014

Zopa tharchhuah buhfai lei kan tum : Supply Minister

Aizawl; Food, Civil Supplies & Consumer Affairs Minister John Rotluangliana chuan, mipuiin buhfai an tlakchham loh nan sorkarin chak taka hma a lak mek thu a sawi a. Phai lam atanga buhfai lei thin chu tih tlem a, Mizoram leh Mizopa buhfai tharchhuah ngei 'local purchase' kaltlangin a tam thei ang ber lei tum a ni, hemi atan hian ruahmanna siam mek leh hmalak mek a ni, a ti. Supply Minister chuan, he ruahmanna tharah hian District tina Agriculture Office-ah te lehkha thawn a nih tawh thu sawiin, Mizoram buhfai tharchhuah local purchase hmanga sorkarin a lei theih chuan mahni tharchhuah ngei engemawzat kan ei thei dawn a ni, a ti bawk. Ei rawngbawlna gas chungchangah, gas a harsat changa mipuiin sorkar an mawhpuh thin thu leh supply officer te leh Gas agent-te nen vawi engemawzat an sawiho hnu-ah, gas sem danah sorkar chu tun hma ang chuan inrawlh tawh loh se tia rel a ni, John Rotluangliana chuan a ti a. Gas agent ten harsatna engpawh an neih chuan a sutkian nan engtik lai pawhin sorkar chu a inhawng a, anmahni pui turin sorkar chu a inring reng a ni, a ti a. Gas-a special permit pek a nih tawh loh tur thu a sawi bawk. John Rotluangliana hian Zirtawpni leh Inrinni khan a bial chhung khaw engemawzat a tlawh a, hneh taka thlan tlin anih avangin a bial mipuite hnenah lawmthu a sawi a. Party pakhat tana thlan tlin a nih loh thu leh Mizoram tan thlan tlin a nih thu te, ram leh hnam hmasawnna atan ngaihtuahna seng turin mipuite chu a sawm a ni.
Share now