Lalchhandama Colney-

Vawiinah thiam ang tawkin Zoram han thlir ve tum ila. Kei aia ril leh thiam zawkte an tam ngei ang; mahse, han ti ve rawih rawih ila, ngaihdante in lo thiam tawh mai a niang chu. Kan hla phuahtu chuan, “Kan Zotlang ram nuam hi chhawrpial run i iang e,” a lo ti a; ni e, a dik chiah mai. Sik leh sa nuam tak kan nei a, a mi chengte kan inlungrual a, state ralmuang kan lo ni bawk a. Kan pi leh pute hun lai phei kha chuan, “Tumah kan chunga leng an awm lo, ni leh thla chauh lo chu,” kan ti thin a ni. Tun hnuah erawh mi ramte ang bawkin mi thuhnuaiah kan lo awm ve ta a. Hei hian that zawkna leh that loh zawkna a nei ngei ang, engpawh nise, lungawi taka kan awm thiam a pawimawh ber awm e. Mizoten hnam dang kan hmuh thin dan hi tun hma chuan a tha lo thin hle, vai hi kan huain, dahhniam hle thin a, sapte erawh kan ngaisang em em lawi si a ni, hmm.. i’n lo ngaithlaho zel dawn teh ang.

Ei leh bar, sum leh pai, etc. lama kan dinhmun: Mizote buh ring hnam kan ni a; mahse, thla thum ei vel bak kan thar lo, a bak thla kaw ei chu state dang atanga kan lak luh a ni. Thlai ilo chawhmeh chi hrang hrang te pawh hi a tam zawk chu kan chawk luh a ni. Khawnvartui kan la lut a, ei rawngbawlna gas kan la lut bawk a, a tawi zawngin Silchar kawng kar khat pawh a pin chuan kan tam a ni deuh zel mai. Mizoram sum leh pai lam han sawi leh ta ila. Chanchinbu, T.V., etc.-ah te kan hre thin ang, sawrkarin cheng chuti zat chu a puk tawh, cheng chuti zat chu leiba a nei,tih te. Nia, kan sawrkar hi hausa lo ve tak a ni. Mi ramte angin pawisa tam tham hmuhna tur factory lian tham, industry lian tham, company, etc. eng mah a nei lo, a neih chhun te chu tereuh tete an ni. Vawiin thlenga kan innghahna/economy la ni ta reng chu sawrkar hnathawkte an ni. Ram changkangah chuan sawrkar hnathawkte hi a hming mai mai chauh an ni thin.

Kohhran lampang dinhmun: Mizote chu 100% Kristian kan inti; nia, khawpuiah phei chuan veng tinah biakin 3/4, panga dawn laite pawh a awm. Hengah hian member eng emaw zah an awm theuh a ni. Kohhran budget-pawh a tam tham ve tawh hle a, thawktu leh missionary-te pawh eng emaw zah kan enkawlin tir chhuak hlawm a ni. Mahse, hetih lai hian kan ramah eirukna, thamna a awm reng tho, tlawnna, lawmthu sawina pekte pawh kan ti reng tho. A tul phawt chuan thil dik lote pawh kan sawi mam hmiah hmiah zel tho. Kristian rama thleng ve vak lo tura ngaih AIDS natnate pawh a hluarna ber pawl kan ni. Zu pawh hi Bible-in a duh lo hle a; mahse, a in mi kan thahnem hle. Mahse, hetih lai hian thahnemngai taka tawngtai thin, Pathian tana invawng thianghlim tlat eng emaw zat an awm ve bawk a ni. Kohhrante kan than nasat rual rualin sual lam pawhin hna nasa taka thawkin bu a khuar ve zel mek a ni.

Ram rorelna lam dinhmun: Sawrkar hmasa han thlir leh ta ila, an rorel a tha ang reng viau,dan leh thupekte an kengkawh tha, sawrkar department hrang hrang te an enkawl danah leh kaihhruainaahte an fel ang reng hle mai. Mi retheite pawh an ngaihsak a, thalaite hmakhua pawh an ngai hle mai. Mahse, sawiselna tur an awm mang loh lai hian rethei ta na na chu sum an mamawh ve tho si a, zu an zuar ta tlat mai. Chu chuan kohhrante pawi a sawi ta a, an tlak phah ta a ni, han ti ta mai ila kan tih sual em em ka  ring lo. Tuna kan sawrkar kal lai mek hi han sawi ve leh ta ila. An tha dawn viau a, an hotupa ber phei chu thusawi thiam tak a ni, fiamthu nge ka hre lo va, a chang phei chuan a thusawi umphak loh changte pawh a nei an ti. Nia, kan hriat theuh angin hripui leng buaipui a ngai ta si a, hna pawh an thawk hman ta meuh lo niin a lang. Hri leng an do dan leh hmalak dan atangte an that tur leh tur loh chu a hriat theih thoin ka hria. Tun kum hi an kum thumna a ni ve tawh a, i’n lo thlir zel dawn teh ang.

Mizoram chu ruahtui tlak thatna ram, engkim that duhna, a chhengchhe ve deuh, tih loh chu a ni a. Mahse, sawi lan tawh angin, state intodelh lo, rethei kan ni tlat mai. Japan ramte Isreal ram te, ram chhia, lirnghing tamna, thlaler, etc. te a ni a; mahse, vawiinah chuan khawvela ram changkang leh intodelh ber pawl an ni. Keini hi engati nge aw, ram tha tak kan nei a; mahse, kan chhawr tangkai miah lo, vawiin thlengin chawm hlawm state kan la ni reng. Tunge mawhphur ang le, hruaitute nge mipui, tih hi zawhna lian tak a ni. Heti renga kan awm chuan khua kan tlai ang e, kan inchhir leh si ang e, a sawt tawh loh hnuah. Thangtharte rochun tur mumal awm lo hian kan ram hi kan chhuah mai ang tih pawh a hlauhawm hle mai. Awle, tapchhak zawl atangin tiang hian ka han thlir ve ta mai mai a,i hmuh dan anih ve leh ve loh chu ka hre lo a; mahse, ngun taka i thlir chuan min tawmpui vena lai chu a tam ka ring, eng nge i thlir ve dan le?