Aizawl July 18, 2022 :  Aizawl South II bialtu Lalchhuanthanga chuan, "Referral hospital ti hlamzuihtute bawk kha tunah hian an lo sawrkar leh a, ZMC hi sawngnawi takin a chhuah a hlauhawm hle. Nakkum march thlaah MBBS first batch final exam an nei tawh dawn a, lo pass chhuak ta sela, eng dinhmunah nge an din ang tih hi ngaihtuah tham a ni," a ti. 

Vawiina ZPM chhung inkhawm neiha thu a sawinaah Lalchhuanthanga chuan Zoram Medical College (ZMC) chungchang sawiin, “A tirah chuan referral hospital angin a lo ding chhuak a, tuna sawrkar mekte sawrkar lai hian tih hlamzuih a ni. Congress sawrkar khan theih ang angin an buaipui chho a, an term tawp dawnah medical college an puitlin thei hram a; kum 2018 August thla-ah class tan a ni. Referral hospital ti hlamzuihtute bawk kha tunah hian an lo sawrkar leh ta a, ZMC hi sawngnawi takin a chhuah a hlauhawm. Nakkum March--ah MBBS first batch final exam an nei tawh dawn a, lo pass chhuak ta sela, eng dinhmunah nge an din ang tih hi ngaihtuah tham a ni. ZMC hi recognise a la ni lo va, recognise ni lo atanga zir chhuak chu eng university-ah mah pawm a ni ngai lo va, medical practice leh a aia sang zawk specialist kan tih ang chi te kha an zir thei ang em tih hi ngaihtuah tham a ni,” a ti. 

Aizawl south II bialtu chuan, “Recognise tur hian ZMC hian hmabak a la nei ko khawp mai a, recognise theitu chu National Medical Commission a ni. A hma chuan Indian Medical Council a ni thin. Tunah hian medical institution-a registration leh thil pawimawh dang lo approve tute chu National Medical Commission an ni. Anni hi an lo kal khat em em mai a, nikum hmasa covid hmaa an lo kal bak kha chu an lo kal leh tawh lo,” a ti bawk.

Sawrkarin thawktute a dah dan chungchang sawiin, “National Medical Commission-in zirtirtu chungchangah duh dan hrang hrang a nei a. Tuna kan ZMC dinhmun nen hian a in ang lo hle. ZMC-ah hian department 21 a awm a, department 10-ah professor an nei a, department dang 11-ah an nei lo a, hetihrual hian zirtirtu thenkhat dah dan leh kaisan danah te sawrkarin duhsak bik a nei ngei niin a lang. Nakkum maiah final exam an nei tawh dawn a, recognition turin NCM norms a tamin an duhtui em em mai a, tuna kan kaldan hi NCM hian an pawm ang em tih pawh ngaihtuah a ngai a ni,” a ti bawk.