Aizawl December 8, 2022: MNF Thalai chuan Cheng vaibelchhe 75 senna ni a sawi Zoram Mega Food Park chu Congress sawrkar lai a din a ni a, insawifiah tur an awm chuan Congress Lal chhungkua leh an khawnbawl te insawifiah rawh se, an ti a, MNF sawrkarin inhnamhnawihna a nei lo tih Zoram mipui hriatah kan puang duh a ni, an ti.

Mizo National Youth Front (MNYF) Headquarters chuan vawiin khan tunlaia sawihlawh tak mai, cheng vaibelchhe 75 lai senna ni a sawi Zoram Mega Food Park, Khamrang, Kolasib District-a mi chu MNYF Vice President Zodinpuia ho in kan tlawh. MNYF chuan, "He hmun hi Congress sawrkar lai kum 2013-2018 chhunga buatsaihfel vek tawh anih avangin MNF sawrkar-in inhnamhnawihna a neilo tih Zoram mipui hriatah kan puang duh a ni," an ti.

Zoram Mega Food Park, Khamrang hmun a mi hi Ministry of Food Processing Industry,Government of India scheme kaltlanga M/S Zoram Mega Food Park Pvt. Ltd-in a din leh enkawl a ni a. He hmun hi Congress sawrkar lai a, Lal chhungkua leh an khawnbawl upa mi tlemte in Mizoram sawrkar hnuaia Department thenkhat namnul taka an pal luih atanga rawn piangchhuak niin an sawi.

MNF Thalai chuan, "Sawrkar kalphung mumal tak zawmlo a he hmun hi rawn piang anih avangin Zoram Mega Food Park chungchangah hian MNF sawrkar chuan mawhphurhna a neih MNYF chuan a hre lo a. Central PMKSY scheme atanga funding hi M/S Zoram Mega Food Park Pvt. Ltd hnena pek an nih avang hian Mizoram sawrkar-a nodal Department tura ngaihte pawhin vawiin thlengin engmah an hrelo a, an hnathawh endik leh a hmunhma sawngbawl chungchang ah te, a enkawltute dinhmun thlengin Mizoram sawrkar chuan a hriatpui lo a ni," an ti. 

MNYF chuan Zoramthanga kaihhruai MNF sawrkar in Mizoram hmasawnna tur ngaihtuaha nasa taka hma a lak lai leh ram mipuite tan hmasawnna rotling tam tak a dinchhuah laiin Congress party in ram tichhe zawng hlira hma la thinah an puh. "A taka an hnathawh hmuh tur awmlo chhunga sum tamtak siamna Zo Carbon chungchangah te, Sakawrhmuituai tlanga Skywalk siamna tur sum tamtak tihchingpenna ah te, Chaltlang-Durtlang inkara Ropeway siamna tur sum tamtak khawihchingpenna ah Congress hruaitute hming lamrik tur a awm reng mai te hi vanduaithlak kan ti takzet a ni," an ti.