Aizawl April 3, 2024 : MNF Adviser K. Lalsawmvela chuan Chief Minister kalchhuak MNF President Zoramthanga hmalakna zarah Mizoramin inkalpawhna kawngpui tha tak a nei a, a nei chho zel dawn bawk a ti.

Vawiina Aizawl Press club a thuthar lakhawm tute kawmna ah K. Lalsawmvela chuan CM kalchhuak ta Zoramthanga'n PMDevine hnuaiah a hranpa ngata Union budget hnuaiah cheng vbch 500 a sawichhuak a ti a, Aizawl bypass road chu hmasawnna lian tak tur ani tih sawiin MNF sawrkar hmalakna chu sawrkar thar in tha taka a tih hlawhtlin ngei a beisei tih a sawi.

MNF Adviser chuan Chief Minister Lalduhoma'n kum tir lama Delhi a zin report a pekin leiverh bika harsatna a awm a, cancel hial an tum a tih leh Union Minister for Road Transport and Highway Nitin Gadkari a sawipui hnua pawm leh ni ta anga sawi chu thangthat a lak duh vang leh mipui rilru dik lova hruai kawi tumna leh a hriat chian loh vang ani a ti a, Aizawl bypass tunnel chu cancel leh enṭhat turin rawtna a awm ngailo tih sawiin nikum october ah tender pawh chhuah vek tawh ani tih a sawi.

K. Lalsawmvela chuan ZPM Leader leh CM Lalduhoma'n ZPM Sawrkarin EPC Mode contract kalpui hmasa ber nia a insawi chu thu dik tawklo ani a ti a, EPC Mode contract chu kum 2018 atangin state PWD in a hmsng tan daih tawh tih sawiin Bamboo Link Road pahnih EPC Mode-a tender chhuah ani a ti bawk.

MNF Adviser chuan MNF Sawrkar chhungin Pu Zoramthanga'n Mizoram kawngpui hmasawnna tur tam tak a sawichhuak a ti a, Lunglei Bypass road chu MNF hmalakna in a puitling chho mek tih sawiin National Highway-6 (Seling leh Champhai inkar kawngpui) leh Myanmar ramri hrula kawngpui sial turah te nasa takin Ministry hmasa ah hmalak a ni a ti.

Aizawl Sustainable Urban Transport Project te leh Silchar atanga Sairang inkar kawngpui chu an sawrkar laiin nasa takin hma an la a ti a, a hlawhtlinna hmuh chhoh mek a ni a ti bawk. Thuthar lakhawm tute kawmna hun ah hian MNF Treasurer Lalruatkima chuan MNF sawrkar chhung hripui len laia harsa tak chunga hmasawnna ruhrel tha din thei tura ruahmamna an neih leh an hmachhawp te chu sorkar thar hian ti hlawhtling ngei se a duh thu a sawi bawk a ni