Aizawl March 7, 2024 : Vawiin khan ZORO General Headquarters chuan ZORO office-ah Executive meeting an nei a, meeting-ah hian Free Movement Regime (FMR) leh Border fencing chungchang sawiho niin, Home Minister K. Sapdanga an fak. Bangladesh-a zofate tan Damdawi thahnem tak hlan nghal.

ZORO chuan Free Movement Regime (FMR) India Sawrkar in hlih a tum leh India Sawrkarin Burma leh India inrina hung (fencing) a tum chu tha an ti lo a, a tul dan ang zel a dodal nise an ti.

Meeting chuan Mizoram State Legislative Assembly session neih mek chungchang sawiin, "Central sawrkar-in Free Movement Regime (FMR) tih tawp a tum leh Myanmar nena inrina, Border fencing kalpui a tum hi tha kan ti lo va. Ti lo turin kan ngen a ni. Dik lo tak taka British Sawrkar in Divide and Rule Policy hmanga Zofate min thendarh hi rorelna pakhat hnuaia kan kun leh theihna turin hma min lakpui zawk rawh se tih resolution an pass hi lawmawm kan ti," an ti a, resolution pu lut tu ZPM Sawrkar-a Home Minister K. Sapdanga chu ZORO chuan fakin, an chhuan thu an sawi.

ZORO meeting-ah hian Bangladesh-a zofate tan Damdawi thahnem tak hlan a ni. ZORO-in Bangladesh zofate Damdawi a pek hi ZORO Adviser C. Chawngkunga, Ex Minister, Dawrpui Vengthar tu leh faten an thawh khawm a ni a, an chhungkaw chungah ZORO chuan lawmthu an sawi. Bangladesh zofate tan hian Thuthlung thar Bible pali an hlan nghal bawk a ni.