Aizawl May 24, 2023 : Chief Minister leh MNF President ni bawk Zoramthanga chuan vawiina Serlui MNF Joint Block Conference a hmanpui naah MNF chu candidate tura an buai loh laiin ZPM chu candidate tur an inthuah tup tiin, Hotu pahnih inbeihna hmuh tur a awm fo niin a sawi.

Zoramthanga chuan, "Kumin kum tawp inthlanpui lo awm turah MNF chuan candidate turah buaina an nei lo tih sawiin, ZPM chuan green signal pek thuah an nei nual a ni. Working President-in candidate turin a sawm a, Leader a lokal veleh a midang a sawm leh a, sawrkar hnathawkte pawh thu tiamin an pension-tir a, an inthuah ta tup mai a nih hi. Keini erawh chu kan boruak a kang chho tual tual a, sawrkarna kan siam ngei dawn a ni," a ti. 

Zorama chuan, "Chakma vote kan mamawh lo, ti a au ziah khan CADC ah candidate an dah a. NOTA pawh an pha lo a nih kha. Hotu pahnih inbeihna hmuh tur awm fo hian an dinhmun that lohzia a tichiang hle a ni," a ti.

Vairengte Multipurpose Hall a Serlui MNF Joint Block Conference vawi 6 na a hmanpui tum hian MNF zawm thar mi 798 a lawmlut a. Zoramthanga chuan, MNF in an party zawm thar zat te hi a dik takin an sawi thin tih sawiin, "Party thenkhat chuan Sangkhat anga sawi mai an duh leh ngei ang," a ti. Lawmluh zat dik tak zel chauh sawi turin kalkhawmte a ngen nghal bawk. 

MNF President Zoramthanga chuan, Hetiang zat Serlui bial pumpuia lawmluh tur in nei hian Bialtu MLA in duh zia, thlantlin leh ngei in duhzia a tilang chianga a ngaihthu a sawi bawk. "Serlui bial, ramria awm ten, mi hrat khawkheng bialtu in nei hi lawmawm ka ti. Tifuh in inti tulh tulh dawn a ni," a ti. 

"Pathian leh mipui zarah kum tawp inthlanah sawrkarna kan chang leh ang. Mizo Union auhla chu - Mizo union, kan ram tan tih a ni a. MNF-in atir atanga Pu Laldenga hova kan thuthlung leh tun thlenga kan thupui chu 'Pathian leh kan Ram tan' tih a ni. Mi thenkhat chuan an thuthlung, an innghahna pawh pawl an thlak apiangin an thlak zel a ni," a ti. 

Chief Minister chuan "Covid curfew karah khan dam khawchhuah kha kan tum lian ber a ni tawp a. Tun term kal mek hi tuarchhel hun a ni. Pathian leh mipui zarah sawrkarna kan siam leh ngei ang a, chu hun chu Malsawmna hun a ni dawn. Mizoram tan hmasawnna, malsawmna tinreng dawn hun a thleng thuai dawn a ni," a ti.