Aizawl July 5, 2024 : Vawiin khan Congress Party chuan Congress Bhavan-ah ‘Friday Political Session’ kan hmang a. He hunah hian MPCC President Lal Thanzara chuan thu a sawi a, ZPM chu an sawi lo ang zela awm a ti a, Remna Ni lawmnaa CM Lalduhoma thusawi chu a dik tawk lo niin a sawi bawk.

Lal Thanzara chuan, “ZPM hian an sawrkar hmaa an tih ve loh reng reng tur an sawi te chu, Contractor in a thawk tawh anga, Restricted Tender kan ti ve lovang, VIP Culture kan tibo ang tih te, kuhva ro dan lova tawlh thla khat chhungin kan tibo ang ti ten an sawi a, pawisate pawh kan puk ve lovang an ti a, sawi loh ang hlirin an tia ni. Chanchinbu ah te kan hmuh ang khan khan kuhvaro tawlhruk Bag 9000 lai mai Vairengte leh a chhevela awm, thuneitute nena lasawn lo tura inremna awm chu a rukin bag 5000 chuang lakbo a ni a. He thil hi thuneitute hriatpui lo chuan chuan a lakbo theih loh ang tih a rinawm," a ti.

“Austerity measures an lak dan tur te an sawi a, MLA Fund te an han tipung a, Board Chairman hlawh te an ti pung a, Councillor hlawh te an ti pung a, Adviser te an ti pung a, anmahni enkawl nan sum tamtak an hmang mek a ni," a ti .

CM Lalduhoma chungchang sawiin, “MZP-in Remna ni lawmna an huaihawt tum khan, Kan Chief Minister hian thudik tawklo a sawi a. Kan Chief Minister hi thudik leh dik lo hrechiang tu a ni chunga khatianga a sawi duh kha a hah awm mange aw ka ti a. MP atanga Anti Defection law hmanga ban hmasak ber emaw ka lo tia, Remna leh muanna avanga bang kha a ni ni reng mai a! Khami ni khan thil dik ziktluak lo a sawi duh kha a lainatawm ka ti. An party ah hian mithiam tak tak te, thil hre thuk tak tak te an awm ve ang a, chungte chuan engtin nge an ngaih ang le?," a ti.

"He sawrkar hian lehkhathiam tak tak te, mithiam tak tak Adviser, Celeb leh Consultant te an nei a, chuti chunga an kal fuh thei lo hi BJP hluihlawn thil an lo la em ni ang tih ka ngaihtuah a, hetiang zela an kal chuan ‘ennawm mak tak’ kan la hmu in ka ring a ni," a ti bawk.