Aizawl: Zoram Peoples Movement (ZPM) Vice President K.Sapdanga chuan, "ZPM hi Mizoramah politics tha hmanga ram rorelna tha tundin tuma beitute awmkhawm kan ni a. Sorkar tha siam tur chuan vote zawn dan atanga duhtui a ngai a. Vote dil thahnemngaih vanglai pawhin, Setana lawm zawnga vote zawn loh hram kan tum thin," a ti.

Nimin Tlungvel Venghlun Branch YMA Hall-a mithar lawmluh hunah he thu hi sawiin ZPM Vice President chuan, "Ram rorel thei tura kan thawh dan kalphungah, Pathian duhdan nia kan rin vangin, tawngtaia bultan a, tawngtaia hnukhar kan duh thin a, kan la inchhir lo. ZPM campaigner te chuan chu kalphung chu zawm theuh turin kan inngen a ni," a ti a. Mizoramah inthlan kan kalpui thiam lo nia sawiin, "Mizoram politics kalsual dana pawi pawl tak chu, inthlan boruak kan kalpui thiam lo hi a ni. Inthlan hi party inelna a ni a, chu inelnaah chuan candidate te hi symbol mai an ni. Candidate-te inelna emaw ti a, kawng tinrenga candidate-te mawh laktir vek a, senso zawng zawng candidate tum tura ngaih hi, ngaihdan dik lo tak a ni," a ti bawk.