Aizawl February 29, 2024: Vawiin khan ZPM General Headquarters office-ah General Headquarters hruaitu hlui leh kum 2024-2027 chhung atana hruaitu thlan thar ten charge inhlanna hun an hmang.

ZPM hian ni February 15, 2024 (Ningani) khan hruaitu thlanna an nei a, President atan Lalliansawta, Vice President atan W. Chhuanawma, MLA leh Treasurer atan Lalchhuanthanga, MLA te thlan tlin an ni. ZPM Constitution-in a phal ang leh General Headquarters Executive Meeting-in a lo pawmpui tawh angin Vice President atan VL Zaithanzama, MLA leh C. Lalnunnema te ruat an ni a, Secretary General atan Er. Vanlalneiha Ralte ruat a ni bawk.

Charge inhlanna hunah hian President Lalliansawta chuan, “Party mipuiten Party kaihhruai hna kan kuta an dah hi a ropui hle mai a, kan hmaah chona lian tak a in chhawp chho zut dawn a, hna kan ngah dawn hle a ni. Mipuiten sawrkar an siam angin kan sawrkar hi thawhpui a, tichak zual zel turin theihtawpin I tang tlang ang u. Kan Party hruaitu thlan tharte aiawhin, kan worker zawng zawng te thlawpna leh finchhuahna ka ngen nghal a ni. Hetianga thawhhona tha nena kan kal zel chuan, MP, VC, AMC, LMC leh kum 2028 MLA inthlanah pawh kan chak zel ka beisei a ni,” a ti.

Hruaitute charge inhlannaah hian Lalchhuanthanga, Treasurer chuan inhmelhriattirna neiin Vice President kal chhuak Dr. Kenneth Chawngliana, Treasurer kal chhuak C. Laltanpuia leh Secretary General kal chhuak Vanlalruata leh member dangten hruaitu tharte duhsakna thuchah an sawi bawk.