Aizawl December 15, 2022: Mizo Hnam Runah mithar lawmluhna hun vawiin khan neih a ni a, lawmluttu MNF Adviser Robert Romawia Royte, Minister chuan ZPM hruaitute an mal thla tan nia sawiin, nakum lamah chuan a bawrin an lawh tur thu a sawi a, ZPM General Secretary ni lai pahnih, Lalthanpuia leh H Malsawma te chu MNF-ah a lawm lut a ni. 

Robert Romawia Royte chuan, "ZPM hruaitute hi kan mal tan pheuh pheuh dawn, kumtharah a bawr bawrin kan lo thung ang. ZPM chu hruaitu mumal awm loin an kal a, mipuiten ZPM-a awm an peih tawh lo, ZPM hotute hi Mizo mipui ten an hriat chian em em te vek an ni. Pawl thar lo din apianga tlar hmasaa awm fo tawh thin te an ni a, Kal phung thar an tih fo pawh hi mipuiten an hmu a, an mahni-ah an beidawng tawh a ni," a ti. 

MNF Adviser chuan, "MNF party chu kum 60 chhung a dinna ngaiah nghet taka ding tawh a ni a, kan hotute leh kan party puite pawh pawl an sawn an sawn ve lo a, Kan party President leh Chief Minister ni bawk Pu Zoramthanga chu mi dik leh Pathian tih mi a ni tih mipui ten an hria a, Zoram dung leh vangah MNF Party zawm tu an pung zel a ni," a ti.

Robert chuan MNF party zawm thar hi tunah chuan an tam tawh em em a, an la tam belh zel dawn bawk a, kum 2023-ah chuan Party zawm thar pawh kan pung zel dawn a, MNF party hi mipuiten an zawm tam chhan ber chu MNF Manifesto kan tih hlawhtlin zel vang leh MNF party hi Pathian rinchhan chunga kal a nih vang leh hnam thuthlung keng kawh tlattute kan nih vang a ni, a ti bawk.

Mithar lawmluh atangin H.Malsawma pawhin thu sawiin, Democracy ram kan ni a, ZPM-a ka awm chhung a,  kan kal phung mumal lo lutuk leh a tu ber nge kan party-ah pawh hruaitu, hotu ber pawh hriat tur awm loa kan kal hi ZPM sawrkar hi ka ring tawh lo a, sawrkarna siam chu an la hlat deuh avangin MNF party a zawm thu a sawi a ni.