Aizawl August 10, 2024 : ZPM Media, IT & Publicity Department chuan 6.7.2024 khan MNF Legislature Party chuan Press Conference kova Zoram mipuite hriatah thu dik tawk lo an pholang an ti a, buhfai man tihsân chungchânga sawrkâr demna thu an au chhuahpui chu a rulru mumal loh thlak an ti a, Card Var ration buhfai man tihpun chu an sawrkar hmaa pass tawh niin an sawi bawk.

ZPM chuan, "Sawrkâr tharah politician inrawlh lohna State Purchasing Advisory Board (SPAB) kaltlanga Chief Secretary hova buhfai supply-tu thlan a ni hi kalphung thar sawrkâr rah chhuah niin kan hria a, lawmawm kan ti hle a ni."

"Sawrkâr hmasa-ah 2.5.2023 khan SPAB kaltlang lovin Chief Minister thu hmuin dan lovin buhfai supply-na man tihsan a ni a, buhfai hi quintal-ah Rs 3,025/- atangin Rs 3,400/- ah tihsan a ni a, Chief Minister-in a duhsak zâwngte dan lova buhfai supply-na man a tihsân sak avânga sawrkârin sum a chawi belhna chu quintal-ah Rs 375/- a ni."

"MNF MLA-te'n buhfai man tihsân chungchânga sawrkâr demna thu an au chhuahpui mai hi ram hruaina kawngah a rilru mumal neih loh thlâk kan ti a, MNF sawrkâr hnuaiah buhfai man tihsânna tur hian committee hial lo din tawh niin, Deputy Chief Minister kaihhruaina hnuaiah 'Committee on matters relating to Non-NFSA Act 2013 (Above Proverty Line) benefeciaries and revision of issue price of non NFSA rice' din a ni a, he committee 17.1.2022 a thukhawm chuan, Card Var ration buhfai man tihpun chu an lo pass daih tawh zawk a, an meeting minute pawh en theihin a awm a ni," an ti.