Aizawl: ZPM hruaitu Lalduhoma MLA chuan, “EVM hi a rig theih avangin MP inthlan lo awm turah hian hmang lo turin Election Commission of India ngen kan tum a. Rig theih a nihzia hi tunhnai khan mithiam ten London ah an entir a ni,” a ti.
Tunhnaia chanchinbumite a kawmna ah ZPM hruaitu chuan Lok Sabha leh Aizawl West I bial MLA bye election lo awm turah Congress te nen thawhho tumin an inbe mek tih a sawi a. MP inthlan lo awm turah ZPM chuan central minister ni tlak candidate a zawng dawn niin a sawi bawk.
Ni 19.1.2019 a United India rally, Kolkata a neih chung-chang sawiin he rally ah hian sawm an nih anga an tel thu leh thu pawh a sawi ve tih a sawi a. “ZPM hian national politics-ah hmun pawimawh kan chang chho zel dawn a. West Bengal Chief Minister ni mek Mamata Banerjee hi Prime Minister atan pawha mi rinkai ber a ni chho mek a, ZPM leh All India Trinamool Congress te hian thawhho zel kan tum a. ZPM in MP kan neih a, central-a kan sawrkar chuan kan MP chu Minister a nih ngei kan ring tlat a ni,” a ti bawk.