Aizawl August 8, 2024 : ZPM Media, IT & Publicity Department chuan ZPM kaihhruai sawrkâra MLA-te hnenah MLA fund zâtve cheng nuai 100 theuh tum khata pek chhuah a ni chu lawmawm an ti.

ZPM chuan, "Sawrkâr hun dangah chuan MLA fund hi tlem tè tè-in installment 4-te a pek chhuah a ni thin a, MLA leh bial mipuite tân hmasawnna hna thawh dawnin a buaithlâk thin hle a ni; hetihlai hian kalphung thar sawrkârah MLA 40-te'n cheng nuai 100 theuha an chan tur Rs vaibelchhe 40 pek chhuah a ni chu sawrkârin hmasawnna hna thawh a ngaihtuahzia a tilang a, ruling mai ni lo, opposition lam bialtu MLA-te pawhin thlamuanthlâk an ti," an ti.

"MLA Fund kan tih mai MLA Local Area Development Scheme hi bial chhûng cheina tur leh bial mipuite tihhmasawnna tur a nih avângin sawrkâr tharin a ngai pawimawh hle a, MLA fund pawh kum khata Rs. Nuai 150 ni thin chu Rs. Nuai 200-ah tihbelh a lo ni tawh a ni," an ti bawk.

ZPM chuan, "MLA bial 40-te chanpual MLA fund zatve tum khata pek chhuah a ni hian MLA te'n an bial chhûnga hmasawnna hna an thawh kawngah kawngro a sut ngei kan beisei a, sum enkawl kawnga a ngaihna hria Chief Minister Lalduhoma, Finance Minister ni bawk leh TBC Lalvenchhûnga, Adviser to C.M i/c Planning & Finance-te bâkah Planning & Programme Implementation Department a thawktute kan chhuângin an chungah lawmthu kan sawi takzet a ni," an ti.