Aizawl December 12, 2023: Ni thum awh tur Ninth Mizoram Legislative Assembly thutkhawm vawikhatna chu vawiin khan tan a ni a. Ninth Mizoram Legislative Assembly kaihruaitu tur Speaker atan chuhtu awm lo (Uncontested) in Lalbiakzama, MLA Chalfilh A/C chu thlantlin a ni.

ZPM chuan Speaker atana thlantlin tak Lalbiakzama hian House zahawm tak chu, dik tak leh fel fai tak, thlei bik leh duhsak bik nei lova a kaihhruai theih nan leh House zahawmna a vawnhim zel theih nan duhsakna an hlan.

Ninth Mizoram Legislative Assembly kaihruaitu tur Lalbiakzama S/o LT Zauva (L) hi March 1,1965 khan a piang a. Chanmari West, Aizawl-ah a nupui fanau te nen chhungkuain an khawsa mek a ni. Thiamna lamah B.Com niin, eizawnna lamah sumdawng mi a ni.

Kohhran lamah United Pentecostal Church (NEI) niin, tunah hian DEACON (Kohhran Upa) ni mekin, Chairman, Aizawl East District Headquarters nihna a chelh mek. Kum 2003 khan Tlungvel A/C leh kum 2013 khan Tuichang A/C atangin ZNP ticket-in MLA Candidate a lo ni tawh a. Tun tumah hian ZPM Party ticket-in Chalfilh bial atanga thlantlin a ni.