Aizawl April 3, 2024 : ZPM chuan Kum 2023-24 financial year annual closing chu financial year tawp ni, March 31, 2024 khan tluang taka zawhfel a ni a, closing hi Chief Minister Lalduhoma, Finance Minister ni bawk chuan uâp-in, finance minister uâpna hnuaia sum lapse awm miah lo a, tluang taka financial year tawp khar a ni chu lawmawm an tih thu thuchhuah siamin an tarlang.

ZPM chuan, "Finance Minister leh thawktute inpêkna a ropui kan tiin kan chhuâng tak zet a ni. Sawrkar kalphungah kumtin Financial Ending hi March ni 31 zanlai dar 12:00 pm thleng a ni a, chuvangin RBI lam pawhin Government transaction khawih Agency Bank-te thlengin he mi ni a Office kai vek turin a hriattir thin a ni. Chutiang bawkin treasury–a thawkte pawhin Office an kai a ngai a, RBI lamin zanlai Dar 11:00 pm ah server an Off dawn a vangin chumi hmaa thil tul te inchinfel hman a ngai thin a ni," an ti.

ZPM thuchhuah chuan, "Kumin Financial Ending ni hi Pathianni (Easter Sunday) ah tak a tlak avangin Department dangte chu Office kai lovin Treasury Office-a thawktute te chauh kal tura tih an ni a, Finance Minister, Chief Minister ni bawk Pu Lalduhoma chuan a mawhphuruhna a nih angin Pathianni chawhma inkhawm banah Aizawl North leh South Treasury-te a tlawh a, hetianga Pa chan changa thawktute hnathawh a hmawr a bawkpui hi ZPM party chuan kan chhuang hle a ni," an ti bawk.

ZPM chuan Party pakhatin Press Release meuh siama Chief Minister Lalduhoma, Finance Minister ni bawk a department enkawl dan chungchangah Pathianni bawh chhia ang hiala sakhuana hmanga mipui rilru a diklo zawnga kawih her tuma thuchhuah an siam chu awmlo an ti a, Sawrkar khalhngil tumna lam aiin Politics-a inchirh thehna leh Chief Minister sawisel tumna hrim hrim a ang a, mihring khawsak phungah leh Sawrkar kalphungah pawh tul bik thil leh loh theih loh thil a awm fo thin a, hemi remchanga la a, mipui rilru, sakhuana hmanga a dik lo zawnga kawihher tumna tiin, thleng tawh lo se an ti a ni.