Aizawl October 24, 2022 : MNF Thalai chuan thuchhuah siamin, ZPM chu mipuite thudik chanve hmanga bual ât tumah an puh a, Thudik tawk lo hmanga ZPM-in mipui rilru lak pen an tum thinna hi sim tawh turin MNYF Headquarters chuan thurawn kan pe, tih an tarlang.

MNYF chuan, "ZPM General Headquarters-in October 22, 2022 (Inrinni)-a Dampa East Block Political Training an hmanpuina ah, Pu Zoramthanga kaihhruai MNF sawrkar an sawi chhan tih hriat taka, 'Aizawl by-pass road atan Vaibelchhe 500 leh Bamboo Link road atan budget-ah Vaibelchhe 100 an dah theih chuan keini pawhin budget-ah vaibelchhe 1000 kan dah thei,' ti a ZPM General Headquarters hruaitute'n an party mipui kal khawmte hma a an sawi hi MNYF Headquarters’ chuan nuihzathlak  kan ti. Mizoram mipui bum tumna leh Budget kalphung hre lo zawk ZPM mipuite thudik chanve hmanga bual ât an tumna ah kan ngai. Thudik tawk lo hmanga ZPM-in mipui rilru lak pen an tum thinna hi sim tawh turin thurawn a pe a ni," an ti.

MNYP chuan Aizawl by-pass road leh Bamboo link road atanga sum hmuh te chu sawifiahin, "Kum 2022, February ni 1-a Union Finance Minister-in sawrkar kum 2022-2023 atana budget a pharh takah khan India hmarchhak State pariat te a bika enkawlna tur Prime Minister’s Development Initiative for Northeast (PM-DevINE) chu ruahmanna a rawn siam a. He ruahmanna ah hian hmarchhak state pariat te tan Vaibelchhe 1500 dah niin a, heng zinga Vaibelchhe 600 chu Mizoram tana ruahman a ni. Sawrkar laipuiin hmarchhak state pariat te hmasawnna tura ruahmanna a siamah hian state dang te thik tham khawpin Mizoram chuan Chief Minister Zoramthanga hmalakna avangin a chang tam a, hmarchhak state pariat-te tana sum ruahman Vbc 1500 atang hian Za-a Sawmli (40%) zet chu Mizoram chan a ni."

"Aizawl khawpui chhung Traffic jam tih ziaawmna tur project, ‘Aizawl By-pass Road’ cheng Vaibelchhe 500 zet senna tur leh Loneitute'n an huan leh lo awlsam zawka an pana kuthnathawktute’n an thlai thar awlsam zawka an phurhchhuah theihna tur ‘Bamboo Link Road’ siamna atan Vaibelchhe 100 zet chu PM-DevINE hnuaiah hian dah a ni. Mizoram tana hmasawnna ruhrel lian siamna tur project pahnih te hi Prime Minister kaihhruai Union Cabinet Meeting pawhin pawmpui tawhin, Mizoram budget atanga sum chengkhat mah sen belh ngai lo 100% central funding turin a pawm a ni," an ti.

MNYF chuan, "Sawrkar laipui budget-ah Mizoram tana hmasawnna lian tham siamna tur cheng Vbc 600 zet mai state mal hminga dah a ni hi Union Territory (UT) leh State kan nih hnuah pawh Mizoramin a la tawn ngai loh a ni a. Hetiang khawpa tam Mizoram hmasawnna sual chhuaktu Chief Minister Zoramthanga hi MNF Thalaite chuan ropui kan tiin kan chhuang tak zet a ni," an ti bawk.

MNF Thalai chuan, "ZPM-in Aizawl by-pass road leh Bamboo Link Road siamna tur, mipuite'n Mizoram budget aṭanga dah hran emaw an tih theih tura thudik famkim tawk lo an aupui reng mai hi pawi kan ti. Union budget leh Mizoram budget lo zirchiang ve tawh rawh se. Tin, Union budget leh State budget hre hrang lo ZPM-in ram kaihruai tura tling bera an inngai hi mipui nuih an ti za hle a ni tih pawh lo inhre tel turin kan duh bawk, an ti.