Aizawl April 4, 2024 : Nizan khan ZPM huaihawtin Thingsulthliah Diakkawn-ah Street Campaign hun hman a ni a, he hunah hian Lok Sabha inthlan lo awm tura ZPM Candidate Richard Vanlalhmangaia chuan State budget piah lama theihtawp a chhuah tur thu a sawi.

ZPM MP (LS) official candidate Richard Vanlalhmangaiha, chuan," Pathian zara MP-a ka lo tling a nih chuan Mizoram mai nilo Zoram pawna awm Zohnahthlakte tan pawh theihtawp ka chhuah dawn a, kan Budget hi indaih lo a pass a ni a, nausen piang tir pawhin cheng tam tak a ba nghal a ni," a ti a. "Budget pawn atanga sum a tam thei ang ber pawh luh hi ka tum a ni a, kan harsatna atanga kan tal chhuah theih nan State sawrkar nen tangkawpa project tam thei ang ber chawlut turin theihtawp ka chhuah dawn a ni," a ti bawk.

He hun hmanpuitu bialtu MLA Professor Lalnilawma, "ZPM MP candidate hi Politics a mi zei tak chu a ni lo mai thei, mahse a taka thawk chi a ni. Party pakhat chuan Rajya Sabha MP ni lai MLA ah an candidate a, tunah Lok Sabha MP ah an vawrh leh a, inkhualtelem ang lekah an ngai emaw tih mai turin an la thutak lo hle a ni," a ti a.

Horticulture Minister chuan, "Mizoram sawrkarin harsatna kan tawh awmthei te Central lama lo sawitur hian Pu Richie aia tha hi an awm chuanglo a, MP-ah pawh hian vote tling ngei turin theih tawp i chhuah ang u," a ti bawk.