Aizawl April 22, 2024 : Vawiin-a ZPM chhung inkhawmah Lok Sabha MP candidate Richard Vanlalhmangaiha chuan Grape chingtute hnen atanga 35% dawng anga an puhna chungchanga a sawi a, an senso phuhrukna atana hman a ni, a ti.

Richard Vanlalhmangaiha chuan, "Lok Sabha MP inthlanah khan tlak huamin ka ding a, candidate zinga lar lo ber kha tute emaw avangin candidate lar ber ka ni ta hial awm e. A hun takah Pathian a che niah ka ngai a, ka lawm takzet a ni. Inthlan hma khan Grape chingtute chungchangah 35% a lar hle a, he thil hi ka sawichhuak ve lem lova, a chhan chu mimal intih hmingchhiat ka duh loh vang a ni," a ti.

35% a lak nia an sawi chhungchang sawifiahin, "Sawrkar laipui khuan Market Intervention Scheme neiin sum hloh rulh dan tur chungchangah State sawrkar tum ve tur 25% leh Central sawrkar tum ve tur 75% a awm a. Congress sawrkar lai khan Chief Minister ngeiin lehkha min ziahsak mah se, state sum thawh ve tur 25% chu sum neih loh chhuanlamin min pe thei ta lo. A hnua MNF sawrkar-ah pawh matching share kan dil a, chu pawh min pe thei lo. A tih theih dan tur nasa taka ngaihtuahin sum leh pai kan seng nasa a, 35% an sawiah khan chung senso zawng zawng chu kan khung khawm a, mahse nasa taka min beih nan an hmang ta hlauh a ni. Chuti chunga kut hnathawktute hmangaih ber ni awm taka an insawi thin hi a mak takzet a. Mimal intihhmingchhiat leh inbeih vak vak hi ka tihdan leh duhdan a ni ngai lo mah se, tih ngaihna a awm tak lovah chuan Criminal Complaint pawh hreh tak chungin ka thehlut ta a ni,” a ti bawk