ZALEN November 1, 2024 : Mizoram Sawrkar chuan hunpui lawm nana Halpuah leh Halmawi hman thin chuan mipuite tan harsatna nasa tak a thlen thin avangin khapna thuchhuah a siam a, he thuchhuah zawma Halpuah leh halmawi tellova Diwali hmangtute hnenah ZPM Party chuan lawmawm an ti a, Minister K. Sapdanga leh Home Department a thawktute chungah lawmthu a sawi a ni.

ZPM chuan, "Halpuah leh halmawi hi Sakhuana hunpui lawm nan hman thin a ni a, kum hlui thlah nan leh kumthar lawm nan uar taka hal thin a ni bawk. Hei hian mipuite tan harsatna tam tak a thlen a, damlote tan phurrit siamtu a ni a, hriselna atan nghawng tha lo tak neiin nausen, thalai, puitling, tar leh upate tan kawng hrang hrangin hriselna kawngah harsatna a thlen a, Halpuah leh halmawi avang hian ran pul hri a leng fo thin a ni."

"Lung thalote tan harsatna nasa tak a thlen bakah boruak a tichhia a, bengchheng (Noise Pollution) nasa tak siamin sum leh pai tam tak a luangral thin a ni. Halpuah leh halmawi hian thil tha thlen a neih loh avang leh nghawng thalo hlir a neih avangin Kalphung thar Mipui sawrkar chuan a ngaimawh hle a, mipuiten thla muang taka hunpui an hman theihna turin Halpuah leh halmawi khapna thuchhuah hi a siam ta a ni," an ti.

"Sawrkarin thuchhuah a siam hnu a Diwali lawmtuten sawrkar thuchhuak zah taka an zawm hi thil lawmawm tak a ni a. Krismas leh kumthar lawmtute pawhin sawrkar thuchhuah leh ngenna hi zawm ve ngei turin kan beisei a ni," an ti bawk.