Aizawl April 8, 2024 : Vawiin khan Mizo Hnam Runah chhung inkhawmna neih a ni a, he hunah hian MNF Vice President Lalchhandama Ralte, MLA chuan thu sawiin, ZPM sawrkar hi Calcutta High Court lakah a mualpho a, Kolkata Mizoram house chungchangah mipui bum an tumna laihlan sak a ni, a ti.

Chhantea chuan, "Kolkata Ballygunge hmuna Mizoram House hlui hralh-a Mizo mipui ten tangkai zawka an chhawr theih tur, House lian leh dawng hlawk zawk MNF sawrkarin sa tura ruahmanna a siam chu ZPM sawrkar tharin thil awmdan kimchang hre ve lo te fuihpawrhnan hman tumin, ram hralhna lehkha lo siam tawh leh a man pawh dawn fel vek tawh chu mumal lo takin cancel-na thupek a ti chhuak a. ZPM sawrkar thupek hi Calcutta High Court chuan Thawhlehni kalta 2.4.2024 khan a hnawlsak. ZPM sawrkarin cancel anih chhan an sawi 'Mipui nawlpui tana tha zawk tur' tih chu Court hian hnawlsakin, Politics thila hamthatna lak tumna lam hawi zawk a ni," a ti.

MNF Vice President chuan, "Kolkata Ballygunge-a Mizoram house awm thin kha a hlui tawh avangin MNF sawrkar liam ta khan sak that dan tur a ruahman a, a hmun ngaia sa tha tur hian building regulations hman mekin G+3 (Mizo chhiara chhawng 3) baka sak a phal lo a. Kolkata hi Mizo mipuite kawtchhuah pawimawh tak anih tawh avang leh pantu kan pun zel avangin chhawng 3 ringawt chuan a dawng hlawk lo hle dawn a, mipuite mamawhna sang zel a phuhru zo dawn lo a ni," a ti bawk.

MNF Vice President chuan, "Ballygunge hmun-ah chhawng 3 baka sanga sak phal loh anih lai hian Salt Lake lamah cheng vbc 18-20 vel te pawhin Mizoram house sak theihna tur khawpa zau ram a la lei theih a, chhawng sang taka sak theih a la nih bawk avangin Ballygunge-a Mizoram House awm thinna hmun hlui chu hralhin, Salt Lake lamah Mizo mipui tam zawk chhawr theih tur, House lian tha leh dawng hlawk zawk sak MNF sawrkar khan a tum a ni. Ballygunge Mizoram House hmun hlui hi hmun laili anih avangin to taka hralh theih a ni dawn tih MNF sawrkar khan a hria a, dan ang thlapa Open Tender chhuahin a zuar a ni. A tira Mizoram Official ten an chhut lawk aia to-a hralh a ni ta nghe nghe a. Chief Minister Pu Lalduhoma sawi dan chuan hralh a nih takna hi cheng vbc 38 chuang a ni," a ti.

Kolkata Mizoram House hralh chungchang hi ZPM sawrkar chuan politics-a kan sawrkar liam ta min beihna hmanruaah an hman nghal chat avangin, ZPM worker te chuan social media lamah thu dik lo hmanga mipui bum tumna an aupui a. 'A leitu hi Chief Minister hlui Zoramthanga fapa a lo ni' ti tein dawt thu an vawrhdarh zui a. Chief Minister hlui fapa hian Court-ah Criminal Complaint a thehluh phah a. Court thupek angin Cyber Police ten chhui zuiin dawt hmanga Chief Minister hlui fapa puhna thu ti darh hmasa bertu, ZPM party worker chu an hre chhuak (Identify) tawh a, dan rorelna a hmachhawn chho tan mek tih a sawi.

Chhantea chuan, "ZPM sawrkar-in ngaihtuahna fim hmang lova sawrkar kal ta tih hmingchhiat tuma thutlukna mak tak tak an siam thin leh, thu phawkphawhraw pui pui an sawi thin hian an puitlin loh zia a pholang chho zel a. December ni 14, 2023-a Council of Ministers thukhawm khan, 'Lengpui Airport chu AAI hnena hlan turin hmalak a ni ang a. Chutiang bawkin ZMC pawh central sawrkar kuta hlan tura hmalak a ni ang,' tih an lo rel ringawt tawh bawk. Hemi tum hian a kaihhnawih Dept. atangin Cabinet Memorandum buatsaih pawh a awm lo nia sawi a la ni ta deuh deuh leh nghal," a ti.

MNF Vice President chuan, "Lengpui Airport hi AAI kuta hlan turin MNF sawrkar hunlai khan tum tam tak inbiakna a lo awm tawh a. Mizoram tana hamthatna awm chhunzawm ve tur, mipuite pawm theih tur inremna MNF sawrkar khan a phut tlat a, chu chu AAI lamin an la rawn chhawp chhuah theih loh avangin, Mizoram-in infrastructure a neih hlu tak, AAI kuta pawngpaw pek ringawt kha MNF sawrkar khan a remti lo zawk a ni," a ti.

ZMC chungchang sawiin, "Mizoramin Medical College a neih hmasak ber leh a neih chhun ZMC pawh Mizo zirlaite tana lungawithlak tawk seat hauhsak chung sia Central sawrkar enkawlna hnuaia dah dan tur ngaihtuahtu Consultative Committee dinin, thui tak MNF sawrkar khan a lo zirchiang tawh. Sawrkar hmasa hmalakna hre chiangtu official te pawh kalphung pangngai anga be rawn hmasa lo a, thu tlukna mak tak tak an lo siam tawh dan te enin, tuna Kolkata Mizoram House chungchanga Calcutta High Court in mualpho taka a siam leh ta pawh hi a mak lo hle a ni," a ti bawk.