ZALEN January 27, 2025 : MNF Treasurer Lalruatkima chuan VC leh LC-te term ding lai ZPM sawrkarin thla 6 chuang zetin a pawt tawi a, dan kalha a hun hmaa inthlanna a buatsaih lui tur hi mipui rorelna (Democracy) kalphung zah lohna leh pawngsualna nasa tak a tlin thu a sawi. ZPM sawrkar chu drug addict bungraw hralh tur dap ching nen a tehkhin bawk.

Mizo Hnam Runah chhung inkhawm vawiina neih-ah hian Lalruatkima chuan, "ZPM sawrkarin mipui sawrkar ni lo, party sawrkar sawhngheh an tum ngawr ngawr avang hian inthlan hun pangngai pawh nghak thleng ngam lovin, tun tuma VC/LC inthlanna neih tur hi hnawhsarum takin a puang a. VC/LC Election-ah Education department hnuaia zirtirtute chu a buai ber tur an ni a. ZPM sawrkarin mipuite inthlanna an kal luih pui hun hi HSLC exam lai leh HSSLC exam tan dawn tep a ni a, Inthlan nan zirna In tam tak hman a ni dawn bawk."

"Zirtirtuten zirtir hna an thawhna tibuai zawng leh zirlaite tana boruak dang siam hun loh lai taka VC/LC inthlanna buatsaih luih a ni tur hi ZPM sawrkarin zirlaite leh zirtirtute a ngaih thahzia tichiangtu a ni a. sawrkar thuneihna hman sualna pawi tak, zirlaite tawrhna thleng tur pawh pawisak lohna a nih avangin, VC/LC inthlanna neih turah hian mipuiten zirlaite thlavang hauhna lantir nan, MNF Candidate-te hnehna min chantir a ngai a ni," a ti.

Ruatkima chuan ZPM sawrkar chu chhungkua in awmtha duhlo/Drug Addict kawl ang mai an ni tih sawiin, "Kan ram hruaitu hmasaten mipui mamawhna hria a, theihtawp chhuaha rohlu an lo siam leh an enkawl Lengpui Airport pawh NGOCC-te meuh pawhin an dodalna karah India Sipai, IAF hnena hralh an tum mek a. An chhuanlam sum senso a hautak tih hi sawrkar kal ta zawng zawng khan an chinfel theih laiin; kum khat chuang awrh an sawrkar a, an enkawl thei lo hi a mak a ni."

"Lengpui Airport hi IAF hnena an hralh anih chuan strategic location-ah hman a ni mai dawn a, mipui tan a him lo a ni. ZMC leh hydel project thlengin hralh an tum ta zel mai hi pa zawmthaw tak, chhungkaw bungraw hralh tur dap ching, chhungkuain awmtha duhlo/ drug addict kan kawl ang mai hian hralh tur an zawng ta zel mai ani," a ti.

ZPM sawrkarah hian Mizo hnam hlutna leh himna ngaihthaha rahbehin a awm ta mek a. Hetianga Mizo hnam himna ngaihthah zui vek tur VC/LC kan neih hi a him lo hle dawn a. Chuvangin, Mizo nationalism himna atan ramri-ah a ni emaw, Mizoram chhung leh pawnah a ni emaw, huai taka ding tlat thin MNF VC/LC kan neih hi a pawimawh tak zet a ni tih MNF Treasurer chuan a sawi bawk.