ZALEN January 28, 2025 : MNF Sub Hqrs Lunglei Vice President Chawngthanmawia chuan, "Kan sawrkar hrawn mek ZPM sawrkar hian an tum bulpui ber chu MNF ni lo, Congress ni lo sawrkar siam a ni. Tun a ZPM sawrkar a phusa ber te hi MNF ni tawh lo leh Congress ni tawh lo te an ni. ZPM dintu ten an tum ram an thleng tawh a. Beisei tak a kalphung thar ti a thlirtu mipuite tan beisei tur a awm lo," a ti.

Vawiin khan MNF Sub Hqrs Lunglei te chuan, LC/VC Inthlan lo awm turah Lunglei West AC Buarpui tlangdung fangin - Vanhne, Thuampui, Serte, Sertlangpui, Kawlhawkah te MNF VC candidate leh party mite nen inkawmhona an nei a. He hun a thusawitu Chawngthana chuan, "ZPM sawrkar hian kan ti ang an tih an ti thei lo mek a. Kan ti ve lo ang an tih erawh an thiam zawng tak a lo ni leh si a. Mipuite beiseina neiin min siam a, chu kan beiseina chu an thamral tir mek hi a pawi hle a ni."

"Lunglei district mipui ten he sawrkar hi beisei neiin kan thlir a. ATL road leh by pass road thlengin chhim mipuite mamawhah tha bik dawn riauin an inzuar a, a sa seh a lo thlen meuh chuan kan thil neih ro neih hlu High Powered Committee thlengin hal ral vek duhna thinlung hial an lo pu zawk a. An nihna dik tak, Thereng ang mai a kawruak, ring tak a hram mai an lo ni," a ti.

Chawngthana chuan, "Kuthnathawktute thian tha ber ni awm fahranin khumbeu nen an chhampual vel a, an duh ang ngei a thuneihna an chan hnu hian, kuthnathawktute chu a hel theih chhung hel hram hram dan an ngaihtuah zawk niin a lang. Tun hunah hian kuthnathawktute thlai thar chhuah hi sawrkar hian ring deuh deuh a D-A-H dah ti lovin, L-E-I lei ngei rawh se."

"Ram inrelbawlna hi en chhin leh a veitu tak tak rilru pu lo kuta dah chi a ni lo tih Zoram mipuite hian hre thar leh ila. Mizoram khawthlang tlangdung hi Mizo Nationalism Movement in na taka a paltlang tlangdung innihna angin he Mizo Nationalism hi he tlangdung atang hian chhi eng leh ila, Pathian leh kan ram tan tiin Mizo Nationalism tung ding leh turin ka sawm a che u," a ti.