ZALEN September 25, 2026: ZPM Senior Vice President Dr. Kenneth Chawngliana chuan vawiin khan ZPM Office-ah press conference a ko a, tun hnaia Val Upa Council (VUC) member thin bang ta Bualhranga leh Rin Sanga, IAS (Rtd) te ban chhhan an hriatpui loh thu leh ngaihdan erawh an neih thu a sawi.

Dr. Kenneth Chawngliana chuan VUC chu a hranpa hlaka awm an nih thu a sawi a, member 11 an awm a, an member tur lakluh pawh an thu niin an inrelbawl naah party an inrawlh ngai lo a, thutlukna an siam pawhin a tam zawk thutlukna angin an kal mai thin. Party mi ang pawhin an awm chiah lo a, party chhunga lai taka rorel tura ngaih an ni a ti.

ZPM hian tun hnai khan an party enkawltu tur an ruat a, Val Upa Council te chu an party Office Bearer te ruat tur hian ZPM Executive chuan a pawm a, anni hian an party kaihruai tur hian President-ah Lalduhoma, Senior Vice President-ah Dr. Kenneth Chawngliana, Vice President-ah Lalmuanpuia Punte leh Treasurer-ah T. Lalhlimpuia te an ruat a ni. Heng hruaitu ruat chungchangah hian a tam lam ngaihdan an lak chu Bualhranga leh Rin Sanga, IAS (Rtd) te hian an pawm ve loh avangin an bang ta nia an ngaih thu Dr. Kenneth Chawngliana chuan a sawi.

Chief Minister leh Home minister inkar tha lo anga sawi chungchangah ZPM Sr. Vice President chuan, "Opposition party ten an party chhung tihchhiat an tumna hmanrua mai a ni. ZPM president-a Pu Lalduhoma rawttu pawh Pu K. Sapdanga a ni a, hei hian thil nihna zawk a ti lang chiang hle a ni," a ti.

Dr. Kenneth Chawngliana chuan Bualhranga ten Chief Minister chu corruption a fihlim lo leh hmeichhiat mipatna lama fihlim lo anga an puhna chu an pawm loh thu a sawi a, Chief Minister hi a eirukna sawi fak pawh an nei chuang lo a, hmeichhiat mipatna lama an sawi pawh hi finfiahna tur sawi tur awma an hriat loh thu a sawi bawk.

ZPM Sr. Vice President chuan, "Tun hnaia opposition party ten anmahni inchingfel hmasa si lova ZPM party chhung inrelbawlna leh a bik takin Chief Minister Lalduhoma beihna nasa takin an kalpui mek a, 2028 kum tawp lama inthlanna tur an urlawk a nih pawhin, ZPM sawrkar sawiselna ngawr ngawr ngaihtuah lovin inthlanpui lo awm tura an party in policy an neih tur duang meka an insawite hi buaipui hmasakah nei zawk rawh se," a ti.

Party pahnih ten thu belhchian dawl lo leh dawt hmanga ZPM an beihna hian an party-ah lungrualna leh tanrualna a siam zel zawk a ni, a ti bawk.