Aizawl June 18, 2024 : ZPM Thalai chuan thuchhuah siamin, Aizawl Municipal Corporation a rorel lai mêk MNF party-in Aizawl khawpui tihhmasawnna tur sum, hmasawnna tur hna aiah party invulhna leh an mahni hamthatna atâna an hman chungchâng-ah, an mahni thlang tlingtu mipuite hmaah an insawifiah ngam dawn em? tiin zawhna an zawt.

ZPM Thalai chuan MNF party hi an insawifiah ngam lo a nih chuan AMC general election lo awm tur leh bye election lo awm turah-te MNF tân mipui fiahna paltlang a harsa hle turah an ngai.

ZPM Thalai chuan, "Kum 2023-2024 chhûnga property tax tling khawm atanga ₹ vbch 1.95 zet mai a hmanna hriat lohva a awmte hi mipui tham lohna lian takah kan ngai a, hmasawnna tur leh khua leh tui tha rilru pu chunga mipuite'n chhiah pek an rem tih êm êm laia, a hmanna hriat lohva chhiah pêk tling khawm heti zat a luang ral leh si erawh a lungchhiatthlâk kan ti hle a ni," an ti.

ZPM Thalai chuan, "Bawlhhlawh hâl ralna khawl ₹ vbch 2.74 man, darkar 24 chhûnga bawlhhlawh ton 10 hâl ral thei tura ngaihin ton 1 pawh a hâl ral thei lo-te, a hnu rei lote-ah hman loh a dah tawl leh mai mai a ni leh si-te hi MNF sawrkâr vânglaia Police Mawza man to leh Êk In kal thei ang maia sum siamna-ah a ngai a; AMC-ah MNF-in thu neihna an chan 2021 -2024 chhûnga an party mi leh sa-te vulhna atâna ₹ vbch 30.92 chuang man hna, khawpui tihhmasawnna tur pawh ni lo, party invulhna atâna hna tenau an siam chawpte pawh hi thuneihna hman sualna lian takah kan ngai a ni," an ti bawk.

Mipui rilru a inthlam mek nia sawiin ZPM Thalai chuan, "Mizoram khawpui ber, Zofate Jerusalem Aizawl khawpuiin hma a sawn ve theihna tura ruahmanna awmte, kum 3 chhûnga mumang ang maia a tham ral leh ta mai hi a pawi kan ti a, khawpui hmangaihtu dik tak thlang chhuak turin mipui rilru a insiam mêk a ni tih an hriat erawhin lawmawm kan ti hle a ni," an ti.