Aizawl : Zoram Peoples Movement Thalai chuan nimin khan thuchhuah siamin Covid hripui thawh hnihnain India ram leh Mizoram ngei pawh min luhchilh mek laiin sawrkar berin a nunphung a tidanglam duh lo nia an ngaih thu leh pawi an tih thu an tarlang a, SEDP Board te chu thiah an duh tih an sawi.

An thuchhuah chuan chhungkaw tin piah lamah sawrkar ngei pawh a dinhmun a tlak hniam zel avangin hei aia dinhmun hniama kan awm lohna turin sawrkar chu a kalphung thiat ngam turin an duh a, ram thatna tur a nih chuan inthlak danglam ngam turin an ngen a ni. 

Kum khat chhunga cheng nuai 303.96 lai hmangtu, SEDP Board 14 te chu tul an tih loh thu leh Vice Chairman atana MLA an dahte chu minister of state tlukpuia dah an ni a, minister of state tlukpui tho, Adiviser to Chief Minister awmte chu thiah a tul an tih thu an thuchhuahah an tar lang a, heng post-te hi Congress sawrkar laia Parliamentary Secretary te nen khan a danglam na a awm tam lo tiin, ramin a hlawkpuina a nei lo niin an tarlang. 

PAHOSS a sum dah sawrkarin a pawm tawh cheng nuai 6,251 atanga sum an la pek chhuah loh, cheng nuai 5,000 chuang la awm chu hri dona atana hmang turin ZMP thalai chuan sawrkar an ngen a. Nunna chu thupui bera neih ngaiah an ngai tih an tarlang a ni.