Aizawl: ZPM Leader K.Sapdanga chuan kum 2018 MLA general election-a ZPM-in sawrkarna an siam theihloh chhan chu inbuatsaihna hun a tawi avang leh thawktute indaih loh vang niin a sawi. Nimin khan Aizawl Press Club-ah chanchinbumite nen inkawmin ZPM Leader K.Sapdanga chuan inthlan neih zawh takah khan thalai ten tum neiin vote an thlak tih sawiin, “Khawpuia lehkhazir, mahni khaw lama hawte kha ‘kalphung thar, mipui sawrkar’ din duhtute an ni a. State pawn lama hnathawk leh zirlaite pawh vote thlakin an lo haw bawk a. Haw ve thei lote pawhin an chhungte hnenah ZPM vote turin an rawn au hram bawk a. Ram rorelna tha neih ve tawh duha thalaite rualawhna hi ZPM chuan a ngaisangin thinlung takin lawmthu a sawi a ni,” a ti a. Thalaite rualawhna lo lang chuan politics a tiphurawmin beiseina a chawk tho hle niin a sawi bawk. ZPM-a tel pawl hrang hrangte party pakhata inchhunfin chungchanga an hmalak tawh dan zawhna chhangin ZPM leader K.Sapdanga chuan, “ZPM a tel pawl hrang hrangte hian pawl pakhata awm hi inthlan hma khan kan remti tawh a. September 2018 khan Election Commission of India (ECI) ah pawh dilna kan thlen tawh a; mahse, siam that ngai tlem a awm avangin inthlan zawha bawhzui atan kan dah a. Tunah hian kan peih tawh a, karleh lam hian ECI ah thehluh leh hman kan tum a ni,” a ti. Aizawl West I bial by election awm tura ZPM candidate chu sawihona a la awm lo niin a sawi a ni.