ZU CHUNGCHANG BAWK LE!! - Lalzuia Colney MLTP Act, Zu khap burna Dan hian tun laiah sawi a hlawh hle a, a bik takin MLTP Act hi a hlawhchhama hlih mai tur ti pawlte pawh an awm niin a lang. A tlangpui thuin zu khap duhte chu zu in ve ngai lote an ni ber a, zu khapna dan hlih duhtute chu zu in duh mite an ni a, chung zingah chuan kan Ukil zingah pawh an awm ve mai thei a, sorkar officer pension tawh zingahte pawh an awm ve bawk mai thei. Zu khap hlawhtlinna leh hlawhtlin lohna teh dan pawh a inang vek lem lo vang. Zu khapna Dan a hlawhtling lo ti pawl chuan zu hi khap a ni chung pawha mi thenkhat chuan duh tawka in tur an hmuh vang hian a ni ber a. A hlawhtling ti lo mah se, zu khapna Dan hi a tha ti pawl chuan hlawhchham hulhualah an dah bik lo va. He Dan hi hlih mai remti lo tam tak an awm ve bawk a, Kohhrana rawngbawltute lek phei chuan zu khapna Dan hlih chu an remti lo hul hual ang. Zu khapna Dan hlih duh lo pawl ngaihdanah chuan, eng Dan pawh hi zaa za chuan hlawhtling a awm thei lo tluk a ni a. Entir nan, tualthah pawh khap tlat a ni a, a hremna Dan pawh khauh tak a ni a, chuti chung chuan tualthat an awm tho va, tun hnaiah phei chuan thiang lo ang hiala kan ngaih mahni nu emaw, pa emaw that te, fate that te, pasal that leh nupui that te an awm a ni. Chuti a nih chuan tualthah khapna dan hi hlih mai tur a ni, a hlawhchham a ni ti ila, tuman an pawm lo vang. Khapna dan dang rukruk, inngaih, uire pawh sawi sen loh a awm. Chuti a nih chuan inngaih te, rukruk te, uire te khapna Dan hi a hlawhchhama hlih mai tur a ni ti ta ila, Kohhran hian he dan hi hlip rawh se ti ta ila, eng Kohhran mahin an remti lo vang. Chutiang bawk chuan zu khapna dan hi a bawhchhe tawk an awm avanga hlawhchham ta der anga ngaih chu khawvel awm chhung hian rem an ti ngai lo vang. Chuvangin, zu khapna dan hlih duhtute hian he dan hi hnawk an ti a, a chhan chu zu an duh vang a ni mai. Zu in duh lo Kohhran Upa te, Pastor te leh Kohhrana rawngbawltute tan a hnawk ve chuang lo. Eng dan mah hi mi zawng zawngin an zawm vek theih a awm lo. Zawm vek thei ta sela Tan in siam a ngai lo vang. Zu khapna Dan hi hlip chiah ta sela, khap chung pawha hetianga a tam chuan, khap loh phei chuan Mizoram hi zuin min chim luai luai mai dawn a ni. Tun ai hian a let tam takin zu a tam dawn a ni, 'A zual zawpui vailenhlo' tih ang kha kan ni ang. Mak ka tih ve em em chu zu khapna dan hlih duhtute hian zu khapna dan hman lai aia tha zawk tur zu tihrem dan tur sawi thei/ziak thei pakhat mah ka la hre lo. Dan hria leh mi thiam tak tak ni awm takte pawhin zu khapna dan hlih mai an duh thu leh a hluarzia an sawi nasa a; mahse, zu khapna dan hman lai aia zu tihrem dan tur sawi thei pakhat mah ka la hre lo. Chauh thuba rawhah, zu hi phalrai ila, zu chhiah a tam ang a, sum kan ngah phah ang tite pawh an awm. Hei hi chu hlauhawm tak a ni. Kan Bible pawhin, "Sum ngainat hi sual tinreng bul a ni," a ti. Tunah chuan khawvel ram changkang nia kan hriatten zu an buaipui dan hi lo en leh ila. USA-ah khuan hnathawktu 13 zelah pakhat chu zu ngawlvei a ni. Motor accident-a thi ni tin 6 awm ziah ang a ni a, chu chu zu vang a ni. Medical Department-in an enkawl 30% chu zu vang a ni a, Industry-in kum khata zu vanga a sum hloh zat chu Dollar 16,000,000,000 a tling. France ram ve thung khu han thlir ila. Medical Department Budget za zela 40 chu zu ngawlvei enkawlna a ni a, Hospital khum 50% chu zu in tuar lo ten an luah reng a, Medical Department ten zu in mite an buaipui ber bawk. Mizoram ve hi han thlir ila. Hriat theih chinah zu vanga thi hi kum 13 chhungin 98 an awm a, mipa 89, hmeichhia 9 an awm (The Aizawl Post 15.7.2013). Pastor Bial 20 an chhiarnaah hmeithai awm zat chu 141 an ni a, za zela 40 chu zu vang a ni (Total Prohibition Synod thuchhuah bawhzuina - Revd. Chuauthuama, Aug. 2000). Hetianga Mizoram bika zu khapna dan bawhchhia an tam chhan nia lang chu : 1) Zu khapna dan bawhchhia hremna a nep vang. Zu vanga Jail-a tangte hi rang takin an bail chuak a, zu bawk an zuar leh thin. Myanmar-ah chuan zu leh Drugs am khap na hle a, Jail-a an dah tawh chuan an ti leh ngam tawh lo. Dam aiin thih an thlang zawk hial tiin an sawi. 2) Zu khapna Dan kengkawhtu (Enforcement) hi a tam ber chu zu duh ve bawk an ni. Zu rem hlau ve tak te an ni a, an check dawn pawhin zu zuarte chu lo inthiarfihlim turin an phone lawk thin tihte a awm. Zawngrengtea serthlum veng ang vel kan ni a, a vengtu ven leh chhawn a ngai bawk. 3) Zu hi tlanchhe chunga khap chi a ni lo. Ti tak takte chu an hlawhchham lo. Kum 1509-1536 lai John Calvin-a hunah chuan Geneva-ah chuan zu an khap hmiah a, zu dawr zawng zawng an titawp vek. Hetih lai hian Europe khawmualpuiah Geneva chu khaw thianghlim bera puan a ni (Kohhran Chanchin - Rev. H.Remthanga & Rev. Lalbiaktluanga). USA pawh khu zu hluarna tak anga sawi a nih laiin a hmun ngeia tlawh leh hretu sawi danin Illinois leh Abraham Lincoln State chu zu awm lohna 'Dry Area' a ni (Zalen 20.1.2001 - Rev. C.L.Hminga). Mizoramah hian zu khap chung pawha heti taka a hluar chuan han khap lo chiah ila chuan Mizoram hi chhe vek rawh se tihna tluk a ni hial ang. Zu khapna Dan, MLTP Act kan kenkawh dan hi a tawk lo. A duh duhin an bawhchhia a ni ber. Kan mi thiamte pawh an bang bik chuang lo. Entir nan, MLTP Act Bung III, No. 9-ah chuan heti hian ziak a ni : “He Dan Section 2-na Sub Section (1) clause (a)-naa sawi angin, Mizoram chhunga chanchinbu ni tin chhuak emaw, hunbi neia chhuak emawah tumahin zu emaw, zu anga hman theih thil dang emaw hmang tur awm, zuar tur emaw, fakmawina (Advertisement) lam chi reng reng an chhuah tur a ni lo. No. 10. He Dan Section 9-na bawhchhia reng reng chu thla ruk thleng lung in tantir theih emaw, cheng 1000 thleng chawitir theih emaw, tantir leh chawitir bawkin hrem theih a ni,” tih a awm a. Ni tin chanchinbua zu rawn sawi mawitute hi an man em le? Heng mite hi an hrem em? Tu mawh nge? Hetiang pawh an man loh avang hian MLTP Act hi a hlawhchham a ni zawk lo maw? Dan chu eng anga tha pawh ni se, a hmangtuin a hman chuan si loh chuan Dan thain awmzia a nei chuang ngai lo. Mi thenkhatin zu khap vangin zu chhia a tam, Drugs a hluar te an ti. Hei pawh hi a dik lohzia chu zu khap lohna hmun Madhya Pradesh, Manipur, Meghalaya, Tamil Nadu-ah te pawh zu chhe in vanga thi leh Drugs a hluar tho. Chuvangin, MLTP Act hi dan ang takin kenkawh ni sela, chuta a la rem lo a nih chuan zu avanga hemna Dan hi tun aia khauh zawka siam leh en that a tul a ni.