Law Deptt.-in Dân thar tur a enfiah mek Aizawl; Excise Minister-in a lo sawi tawh angin, Mizorama kum 19 chhung zet kenkawh tawh zu khap burna dan 'The Mizoram Liquor Total Prohibition Act' chu thlahdul hret tuma hmalak mek a ni a. Mizoram Legislative Assembly 7-na, March ni 18, 2014 atanga neih turah he dan hi putluh hman tuma buaipui mek a ni. Excise Minister R Lalzirliana chuan, "Thil thui tak sawi theih a la awm lo a, MLTP Act-a a 'Total' lai paih a nih chuan kan zuar dawn tihna chu a ni mai a," tiin, zu khap leh hlih chung-changa ruahmanna kal mek chu Law Department-in a enfiah mek tih Zalen zawhna chhang-in a sawi a. March thlaa Assembly Session lo awm turah hian putluh hman a ni dawn em tih pawh a la chiang lo niin a sawi a. He ruahmanna kalpui mekah hian sorkar term hmasa lama zu khap burna dan zirchiangtu Study Group-in sorkara report an thehluhte pawh tangkai taka hman a nih thu a sawi. Zu khapna thlahdul tum a nih thu erawh chu Excise Minister hian tunhnaia Tualbung khuaa sorkar thar lawmna in-khawmah a sawi a. Mizorama zu khap burna dan hman mek chu thlahdul hret tum a nih thu leh hemi chungchangah hian sorkarin Kohhrante rawn a tum loh thu te, rawn ni ta se, Koh-hran chuan engtikah mah thlahdul an remti dawn lovin a lang a, sorkarin thladul tumna a kaltlangpui tho si chuan, Kohhran pawi khawihna a nih theih dawn avanga rawn tum a nih loh thu a sawifiah nghal bawk. Tunlaia Mizo thalai tam takin zu an in avanga zu leh a kaihhnawih thil avanga an chhiatpui nasat thu sawiin Home Minister chuan, zu ah hian damdawi leh thil tha lo tak tak pawlh a nih thin avangin, zu in lo thei lo ten zu tha an in theih nan hmalak mai a tha nia ngai tam tak an awm ve tawh bawk avangin, ngun taka ngaihtuah chungin zu khap burna dan chu thlahdul hret tum a ni, a ti a ni. ZU KHAP LEH MIZORAM January ni 21, 1972-a Mizoram UT a nih hnu-a Legislative Assembly hmasa berin Mizoram Excise Act 1973 (ME Act '73) a siam a. He ME Act '73 hi a Rules te nen October ni 10, 1984-ah hman tan a ni. He dan hnuaiah hian Aizawlah sorkar phalnain zu dawr 10 leh Bar 4 a awm a. Lunglei-ah zu dawr 4(pali) a awm bawk. Aizawlah zu wholesaler 2 an awm bawk. Mizoram chu February ni 20, 1987 ah State puitling a lo ni a. ME Act, 1973 chu tha tawk lova hriat a nih vangin zu avanga harsatna awmte sukiang turin Legislative Assembly chuan dan khauh zawk Mizoram Excise Act 1992 a siam a. Mahse, he ME Act, 1992 hi hman zui a ni ta lo. Zu khap burna dan, The Mizoram Liquor Total Prohibition Act 1995 leh Mizoram Liquor Total Prohibition Rules, 1996 chu February ni 20, 1997 ah hman tan a ni a. He dan hi Autonomous District Council 3-ah te chuan hman a ni ve lo a, he dan hi tlem tlema siamthat zeuh zeuh a ni a, tun thlengin hman zui zel a la ni. MLTP Act hmangin Security Force te hnenah Liqour Licence pek a ni a, tuna Licence nei mek te chu : Aizawl District-ah (1) 457 Field Ambulance, (2) 26th AR, (3) Hqrs. CE, Project Pushpak, (4) Hqrs. 24 B RTF, Seling Tlangnuam; (5) DIG, SHQ BSF, Durtlang; (6) 173 Bn. BSF; (7) Hqrs. Mizoram Range, AR Khatla; Lunglei District-ah (1) 40th AR; (2) 96 Bn. BSF; (3) 142 Bn. BSF; Serchhip District-ah 4th AR leh Kolasib District-ah CIJW School, Vairengte; A vaiin 12 an ni. MLTP Act hmangin Doctor-in damdawi atan zu a chawh thei a, chutiang 'prescription' hmanga Liquor permit neite chu Civilian 178 leh Ex-servicemen 2,231 an ni. Civilian te hian 'confiscated liquor' dahna, Departmental Store atangin an lei a. Ex-Servicemen te chuan Sipai Canteen Store atangin an lei thung. (Source : Study Group of MLTP Act 1995 Report) Zu/Alcohol vs. Ruihhlo (Drugs) Kum 1984-2014, January 13 chhungin ruihhlo (drugs) vanga thi Mizoramah mi 1,282 an awm tawh a, heng zinga 1,146 chu mipa an ni a, a dang 136 te chu hmeichhia an ni a. Spasmo Proxyvon leh Parvon Spas vanga thi tam berin mi 1,145 an ni a, heroin vanga thi 96 leh ruihhlo dang vanga thi 41 an awm bawk. (Source : Mizoram Excise & Narcotics Deptt.) Kum 1997-2012 chhungin zu chhe in vanga thi mi 55 chhinchhiah an ni a, hengte hi zu-a Methyl Spirit pawlh in avanga thi 36, Pathedine pawlh vanga thi 2, Methanol pawlh in vanga thi 1, BEDC (Burma zu) in vanga thi 2 leh engnge pawlh a nih hriat loh in vanga thi 14 an awm. ( Source :Mizoram Excise & Narcotics Deptt. as on 7/7/2012)