Aizawl: Mizo National Front sawrkar chu zu zawrh tur lak khawlsa tihralna hun pe loa ‘dry day’ a puan rei lutuk vangin Gauhati High Court-ah vendor lam chuan khin (stay) an tum niin thudawnna chuan a sawi. “Vendor-ten kan duh loh ber chu exit protocol awmlo hi a ni ber a. Tunah hian MLPC Act hi la hman mek a ni a, dry day an puan thut avangin zu hralh tura kawl sa hi vaibelchhe 40 vel a awm a. December 21, 2018 atanga January 11, 2019 thleng puan a ni a, chumi hnuah March 10 thleng pawhsei leh a ni a. An tum ber nia lang chu zu khap burna dan siam fel hma chu hralh theih loha siam a, MLPC chu zu khap burna dana thlak a nih hnuah tuna stock la awm zat chu tihchhiat niin a lang a ni,” tiin Zalen thudawnna chuan a sawi.   Thudawnnain a sawi zel danin eizawn nana lo hmang tawh tam tak an awm a, MLPC dan a la tawp si loh avangin thalai 300 dawnin an hna an chan a, vendor leh warehouse lam pawhin luahman, electric bill, staff man an la pek a ngai bawk a. Tuna zu stock awm sate hi tax pek vek tawh a ni a, hralhna hun an siam loh chuan sum tam tak an chan dawn a, hemi hun tal hi siamsak an phut a ni. Hemi chungchangah hian Chief Minister Zoramthanga pawh hmuh ni tawhin awmzia a awm loh avangin Thawhlehni hian Gauhati High Court, Aizawl Bench-ah dry day stay turin ngenna an thehlut dawn niin Zalen an hrilh bawk a ni.   “Dry day an puan chhan hi behchhan awmze nei lo niin kan hria a, festival leh sawrkar ni bik - Republic Day, I-Day leh a dangte chu kan hrethiam a, tuna an tih dan hi chu a rei lullai deuhin kan hria a. Tih dan pangngaiin Mas leh Kumthar bawr ni 2/3 te kha puang sela chu tuna stock hi kan hralh zo tawh ang,” tiin vendor intelkhawmte chuan an sawi a ni.   An sawi zel danin hunpui lai dry day rei tak an puan chhung khan zu chu permit pek a nih tawh avangin a lo lut reng tho a, hralh chhuah theih a ni lo bawk a ni.