Aizawl May 2, 2024 : Central YMA President Lalhmachhuana chuan, Zu leh ruihhlo vanga buai ten hlauh an neih a ngai tih a sawi a, zu leh ruihlo laka fihlimna tur leh khuahkhirhna thu a tam thei ang ber mipui-ah puanzar a ngai a ti.

Vawiin khan Excise & Narcotics Minister Lalnghinglova Hmar hovin Central YMA Office Bearers te leh Excise & Narcotics Department chuan Zu leh ruihhlo dona kawnga hmalak dun dan tur sawi hovin meeting an nei. He hunah hian CYMA President chuan, “Zu leh ruihhlo hluar zel hi mipuiin 'Ngaia an neih' mai a hlauhawm. Chuvangin hetianga khawsate hian “Hlauh an neih” a tul. Chuvangin zu leh ruihhlo laka fihlimna tur thu leh khuahkhirhna thu hi a tam thei ang ber mipuite hriatah puanzar a ngai a ni,” a ti.

E&ND Minister Lalnghinglova Hmar chuan “Mizoramin zu leh ruihhlo vangin a tuar nasa tawh a, hemi do tur hian Excise & Narcotics Department leh Mizorama pawl lian ber, Central YMA chuan hma kan lak dun zel a pawimawh a, Chutianga thawhhonaah chuan hmun hrang hrang atanga zu leh ruihhlo rawn lut tur dan thu-ah te, a dapchhuahna chungchangah te thawkho zelin, YMA bakah, sawrkara department dang te, kohhran hruaitute pawh thawhpui zel an la ni ang,” a ti.

Excise & Narcotics Commissioner Z. Lalhmangaiha, , Department chuan, "Tun hnaia Burma ram buai vanga ral tlante avangin Phunchang leh a chhehvela zu siam an pun belh bakah, Aizawl-a Hotel leh Restaurant thenkhata ualau taka zu chelek thin an awm nia sawi pawh enzui a ni ang. Zu leh ruihhlo dona kawngah chuan Central YMA emaw pawl hrang hrang dangte chu Excise & Narcotics department-in a thawhpui zel thei,” a ti.

He Ruihhlo dona chungchanga inkawmkhawmnaah hian Peter Zohmingthanga, Joint Commissioner of Excise & Narcotics leh H. Lalrinpuia, Secretary Kumpuan Committee & CEC Member, CYMA chuan report an pe a, Lalramsanga Sailo, Secretary to Govt. of Mizoram, Excise & Narcotics chuan lawmthu a sawi a ni.