Zu khap bur a nih hma hau atanga khap bur a nih chhung kum 17 zet leh vawiin thlengin, ZU khapbur lova khuahkhirna hnuaia zawrh a nih ve tawh chuan kan sawi bâng ve tawh ang chu kan tih nak laiin, ‘A zualzawpui vaihlen hlo’ an tih ang maiin kan sawi uar ta sauh emaw tih mai turin Chanchinbuah, T.V-ah, titihonaah leh tunlaiah phei chuan internet kaltlanga titihona social media-ah te hlei hlei kan sawi uar emaw tih mai tur a ni a, han sawi ve leh pawh a inthlahrunawm duh hle. Chuti chungin tlem te tal han sawi leh hram ila. Ti tak maia zu zawrhna ‘Wine Shop’ kan duh lo leh MLPC Act hman duh tho si; mahse, mahni venga zu dawr awm duh miah si lote rilru hi engnge ni ang aw? tiin ka ngaihtuah thin a. Kan nu leh pa leh rual u zawkte ngaihtuahnaah hian tun hma lama Rakzu zuar thin, zu sa thinte kha an rilru mitthla leh suangtuahnaah hian a la riak ang a, kan tunlai Wineshop te pawh hi khang hunlai zu dawr angah khan an ngai emaw ni chu aw ka ti thin. Ni e, Mizoin rakzu zuar kan hriat tlangpui hi chu thenawm atan pawh iaiawm tak an ni deuh vek mai. Mahni in chhungah ZU an chhuang nam rum rum a, sarangah an zu siam sa an fun nam leh rum rum a, nilengin zu in mi an lut chhuak zut reng a, an thawm pawh a tha thei hle. Zurui titi, zurui insual leh zurui tap thawm te, zurui phur zai te bak hriat tur a awm ngai lo va. Nuthlawi zu in leh pathlawi zu in tur kawngkaah intawklawi tawk velin an indawt zut a, chhungkaw nun pawh a awm hman lo va, zu zuar fate puitling taka thang tha turin thu tha dawnna hun pawh an nei lo va, nei pawh nise chutiang hrilh nachang hre lo Nu leh Pa nei an nih avang zu zuar an ni chawk thin. Hengte hi kan suangtuahnaah hian a la lian em a, kan tunlai Wineshop pawh hetiang ruangam a din turah kan ruat vang hi ni maw, kan do vak ni ka ti deuh thin. Tunlaia IMFL, Sap zu kan tih maite hi chu a siamtu company lamin mi hip thei tur ang berin an tuam mawi a, kan damdawi leh biscuit tam tak ai hian a tuamna lehkhakhawng pawh hi a nalh mah thin awm e. Rakzu zawrhna hmuna a rim nam thin chu sawi loh, phui taka char tlat a nih avangin a rim hriat tur pawh awm lo, felfai taka kan tunlai thawmhnaw show room ang mai a mi mit la tura pho chhuah an ni a, Vairam kan kal pawhin a in ngai lem lote tan pawh a hmuhnawm tham zet turin an tlar tuar thin a nih hi maw! Hun han kal leh deuh se, heti luih luih a dodal lo hian Wineshop te pawh kan neih chho theih a rinawm. A thuhrimah pankhawr zawrhna ang maia in 4/5 lek lek dana zawrhna hi hun tur pawh a ni lo. Veng zawng zawnga zawrh tura buatsaih pawh a ni lo tihte hi hriat tel a tha mang e. Engpawh nise, Kohhranin zu a do a, sorkarin khuakhirna hnuaiah a zuar bawk a. He thil lo thleng hi kan mi thiam emaw, mi vantlang emaw, a tute mai pawh hian kan manganpui a, khawi hmunah pawh, a rem emaw, rem lo emaw, kan sawi reng mai a. Thenkhatin zu thlah zalen a nih chuan zurui insual buai leh zurui vak vel, khawlai kal tinuam lo khawp awm turah te kan ruat a, sualna te pawh pung deuh turah kan ngai. Thenkhat phei chuan an ngai chang pawh ni lovin zu zawrh a nih chuan a that lohzia lang chhuak nghal vat se zurui intibuaite hi awm zut se an ti zawk emaw tih mai tur khawpin he MLPC Act hman hun hi kan lo ralkhat thlir thin a nih kha. Vanneihthlak deuh maiin chutiang ang zawng chu sawi loh, zu zawrh kum bul atangin zu rui aiah hlim rui leh lam rui kan buaipui zawk ta mah mah a. Sorkar thiltih pakhatmah tel lovin, Pathian hnathawh a lo lang a, nikum lamah te Zoram pum dengchhuak lo mah se zu zawrh kum takah namenlovin Kelkang harhnain min deng ta zawk a, a va ropui em! Thenkhat Pastor pension zu rui chungchang auchhuahpui châk tak tak thin ni awma ngaihte pawh khan zu rui lam ni lovin taksa chetna leh hlim ruih, lam ruih chungchanga an ngaihdan leh Biak In vawn zahawm a tul thu lam lam an ziak ta zawk a. Hengte hi zorkarna chelhtute vang ni lovin, a Kohhran mite tawngtaina rah zawk nite pawhin a lang. Veng tin maiah hla hruaitute kal hma ngai khawpin zai leh lâma Pathian fak châk thalaiin Biak In lamtualah an lo nghakte hi khawilai kil emawa zu lei tur lo intlar lawkte ai hian sawi tam peih ila kan thatpui zawk ang. Hmanni lawk, July 3, 2015 khan Police ten Aizawl SP hovin Crime Review Meeting an nei a. January 2014 to June 2014-ah kum 2015 January to June chhunga case register, charge sheet, pending etc, Comparative Crime Figure Jan - June 2014 & 2015 atan hian case langsar zual 10 atangin thlirho a ni a. 2015 kum chanve chhung hian case register chu a tlangpuiin a tlem hret a. Amaherawhchu, Non-FIR case lamah MLPC Act hmang hian zurui case te kaltir a nih tak vek avangin MLTP Act aiin MLPC Act hman hnu hian regular case a thla hniam ta zawk a ni, tihte hi hriat a va nuam em! A chhe lai tar lan pawh a that rualin a tha lai tar lan tam hian zirtirna awmze nei mipuiah a pe zawk awm e. Zu pawh sawi sawi lo hian, a in mite hian mi dang pawisawi lova an in mai hi phal ila, chutih rualin Kohhran chuan a tih tur ti reng bawk se, Kohhran huang chhungah zu in that lohzia sawi uar se, a ngenna ngai pawimawh lo chu thunun zel mai se, sorkar pawhin a dan zam pela zu rui buaite chu hrem zel mai se. Kan lungrual tlang thei mai awm e.