Ni tin chanchinbu leh local T.V.-ah te kan lo hmuh angin Mizoram sorkara Home Minister chuan Zu khap burna kan hlih chuan kan zuar dawn chu a ni mai a, a ti a. Zu khap burna Dan kan hman mek hi tlawmngai pawl hrang hrang leh zirbing tura ruatten ngun taka an zir chian chian hnuah a hlawhtling lo/ hlawhchham ti a sorkarah an reprt vang niin a lang a. Mizoramah zu permit neia zawrh a nih lai khan tun ang tak hian Aizawlah mihring kan la tam lova. Khati chung pawh khan pavalai leh thalai tam tak chuan an nun an hloh hman a ni. Chuta tuartute chuan tunah pawh hian hreawm an la ti em em a. Zu dawr a awm avang leh Zu changkang mantlawm te tea lei theih a nih avang khan chhungkaw tamtak chuan zu manah sum tamtak an khawhral a. Chu chuan zu zawrh hmaa an chhungkaw khawsak-na ang kha a banphak lohtir a. Chhungkaw tam tak chu an rum a ni. Chu mai nilovin zu in thar an tam a, chu chuan khawlaiah leh inchhung khurah suah sual rawngbawlna a tipung a. Chhungkuaa zu in awmlohna thin kha zu in awmna chhungkua an lo ni a. Zu permit-in a hrin chhuah liau liau a ni. Zu atanga chhiah lak erawh chu a tam a ni mahna; zuin a tihchhiat chhung-kuate harsatna erawh chu chu zu chhiah chuan a tidam thei tawh si lo. Sum chu zu zuartu leh sorkar chuan a hmu tha ngei mai, mahsela sorkar siamtu leh neitu mipuite erawh chu tahna ruamah a hnuklut a ni. Khatih hun laia puitling zu in ve lote kha chuan kan la hrechiang hlawm ngawt ang. Mahni veng leh khuaah insual buai leh innghirnghona thelh tumin kan hmanhlel hlawm a nih kha. Mi tupawhin zu a ruih tawh chuan a nihna dik tak leh a hriatna fim a hloh tawh a, mi dang daih leh thil tithei deuh angin a inhria a, a nunphung a buai thin. Engvangin nge heti taka zu hi tihzalen kan duh loh kan tih chuan a ruih theih tlat alawm mawle. Bawnghnute in nena tehkhin theih ziazang a ni lo tlat a. “Tu-mahin ka bawnghnute in insawi ri ngai lo va, ka zu in erawhchu in sawi bang thei lo” tih tawngkamte hi chu thu awmze nei lo a ni. Zu tha mantlawma in duh ho thusawi mai mai a ni. Sorkar hian zu permit pek hi a duh a nih pawhin mipui ngaihdan la se a tha ngawt ang. Veng tin leh khaw tinah vantlang in-khawm huaihawt se la, chuta kalkhawmte thu-tlukna chu ZU chung-changa Mizo mipuite ngaihdan a ni ang. Dik tak chuan tuna tlawmngai pawl, zu khapna hlawhtlin leh hlawhtlin loh thu sawitute hi ZU CHUNG-CHANGA KAN AIAWHA KAN NGAIHDAN sawitu tur atana kan thlante an ni lo tih chu kan hre theuh ang. Pawl chuan tih tur bik/thil tum a nei thin a, chutah chuan tuna tlawmngai pawl an tihte hian ZU chung changah engmah thil tum an nei lo. An pawl inkaihhruaina theuh pawh en ila chutianga ZU chungchanga thutlukna readymade nei sa an awm lo. Chuvangin tlawmngai pawlte pawh hian an sawi loh tur an sawi a ni tih hi an hriat a ngai khawp mai. Tlawmngai pawlten zu khap burna dan hi a hlawhchham e an tih hi tan chhanah sorkarin a hmang dawn a nih chuan thil tam tak ngaihtuahzui tur a awm ang. Zu hi a in velo ho hian in rui zawk te an ti a. Kan rui ni lovin kan buaipui zawk a ni. A chhan chu Zu in thinho hian an ruih thin vang a ni. Dik tak chuan tual that/tual thihna a lo awm hian a thattu aiin a thaha chhungte an buai zawk ziah. Mi accident-a a thihin a thia ai chuan a thi chhungte leh khawtlang an buai zawk. Muthlu chunga motor khalh hi khap a ni a. Mahsela tun thleng hian accident tam tak thlentu chu driver muthlu a ni ve fo. Zu zawrh phala ruih phalloh hi thil awmze neilo a ni. Chaw eiah mi kan sawm a, ei puar kan remtilo ang deuh a ni. Chutiang chu khawvela thil awm theilo a ni. Thawmhnaw thar leisak a, hak phal loh ang vel a ni. Ruih phalloh a nih chuan zu leitu apiang kha umzui turin police detail fo a ngai ang. An ruih dawn leh dawn loh a chiang si lova. Bawngpui vulh a a hnute sawr khap ang vel a ni bawk ang. A… thil ni thei lo nihtir tum chu buaithlak tak tur a ni. Zu zawrhin a ken tel nghal chu zu in a ni. Phalna pangngaia thil zawrh reng reng chu hman zui theih a ni angin zu zawrh pawh phal a nih chuan a in pawh phal nghal a ni. Ziaka dah kher a ngai lo. Football chu pet tur a ni a, chawhmeh atan a ni lo. Zu zawrh a nih huna thil lo thleng turte:- 1. Zu man a to avanga lei ngai lovin an lei ang. 2. Zu in tur a van avanga in ngai lovin an in thar ang. 3. Chhungkuaa zu in awm ngai lohnaah zu in thar an awm ang. 4. A ruka zu in thin mipa/hmeichhia ten ualau takin an in ang. 5. Zu ruih vanga nupui fanau laka inthlahrung thin te an huang tau sauh ang. 6. Zu ruih vanga insual buaina a tam ang. 7. Zu ruih vanga Nupa inthen(divorced) an pun g ang. Kan faten zu an rawn in ve ta a, a lawmawm tak tak a ni ti hi an awm ka la hre lo va. Kan monuin zu a in ve thei a a tihzia tak tak a ni ti hi ka la hre lo bawk a. Ka nupuiin zu a in ve thei ta a, ka lawm tak tak a ni ti hi ka la hre lo bawk. Tuna zu zawrh duh ho hian an tu leh fate hmakhua an ngaihtuah tel ve ang em? tih hi zawhna pawimawh tak a ni e.