Aizawl: Mizoramah dan hnuaia zu zawrh kum li chhunga Excise & Narcotics Department (END) chhiah hmuh chu Rs. 2,43,78,55,154 a tling a. Hetihlai hian zu zawrh tihtawp a nih hnu kum nga chhunga hmuh chu Rs. 21,29,71,448 a ni.

END tar lan danin, Mizoram Liqour (Prohibition and Control) Act hman tan, kum 2015-a zu chhiah atanga sum hmuh chu Rs. 40,54,18,962 a tling a, 2016-ah Rs. 71,56,03,644, 2017-ah Rs. 62,89,31,799 leh 2018-ah Rs. 68,79,00,749 hmuh a ni.

Dan hnuaia zu zawrh tihtawp hnu, 2019 atangin zu atanga chhiah hmuh a tlahniam nghal a, Rs. 15,61,29,492 hmuh niin, 2020-ah Rs. 92,56,326, 2021-ah Rs. 94,51,198, 2022-ah Rs. 174,28,426 leh 2023-ah Rs. 2,07,06,006 hmuh a ni.

Zu zawrh a nih atangin END chhiah hmuh a nasa takin a pung a, kum 2015 atanga 2018 chhunga chhiah hmuh chu kum tin Rs. vbc. 40 atanga Rs. vbc. 70 inkar a tling pha.

Mizoramah kum 2014 khan Mizoram Liqour (Prohibition & Control) Act siam niin, January 15, 2015-ah hriattirna chhuah a ni a, March 16 atangin zu zawrhna dawr hawn tan a ni.

Kum 2018-a MNF sawrkar a din hnuah an tiam angin zu dawrte kharin zu khapna dan siam a ni a. Mizoram (Liquor Prohibition), Act chu March 20, 2019-ah Assembly House-ah pawm niin zu khapna kalpuina tura duan, Mizoram Liquor (Prohibition) Draft Rules, 2022 rawtna chu Chief Minister Zoramthanga hova thukhawm council of minister chuan March 25-ah an pawm.

Chief Minister Lalduhoma chuan January 20, 2023, Inrinni khan CMO conference hall-ah zu zawrh leh zawrh loh chungchanga thuthar thehdarhtute zawhna chhangin, an agenda hmabak a nih thu leh mipui huapa inrawnkhawmna an buatsaih tur thu a lo sawi tawh a. Chief minister sawi danin zu chungchang chu sawrkarin a ennawn ngei dawn a, engtin nge kalpui a nih dawn tih erawh sawi theih a la ni lo.