Pi leh pu duhtakte, Zu leh a hnathawh chungchanga lehkhathawn ka rawn ziak hi ngaihtuahna hmanga lo chhiar turin ka ngen a che u. ‘Zu hi thil a ni’ an ti thin a, thil a ni ngei a, a dik e. Mahse thilte hi an inang vek lo. Tuisik te, bungbel te, puanthan te pawh hi thil chu an ni vek mai. Mahse Z< chu dailuah ang ngawt chu a ni si lo. Puanthan leh dailuah zawrh chu zu zawrh nen chuan inang lo tak a ni. Doctor ten a taka an finfiah vek tawh Zu chungchanga an thil hriat an sawi tlemazawng han tar lang ila. 1. Miin zu a in hian thluak a han bitum chat mai a. Thluakah hian cell maktaduai 1400-1600 a awm a, zu tum khat in hian cell 20,000 vel a tikhawlo thin an ti. Rilru a lo f$m lo nghal a, hmuh sual leh hriat sual a awmtir a, pawikhawihna a thlen thin. Pawisak a titlem a, mipat-hmeichhiatna hman sual pawh a tiawlsam nge nge a ni an ti. 2. Chaw kawng (dâwt) a tikhawlo va, chaw kawng cancer pawh hi zu in miah a tam deuh an ti. 3. Pumpui lâwng leh cancer te a awmtir a, thisen khang theihna a tichhia, kaw chhunga thisen chhuak (internal bleeding) pawh zu in mi tan thihpui a hlauhawm bik an ti. 4. Lung a khawih pawi a, lungphu chawla thih pawh hi zu in mi tan a hlauhawm bik an ti. 5. Kal that lohna hi zu in mi tan in lo mi aiin a let sawmin a hlauhawm a. Kal that lohna leh a behbawm thihpui a hlauhawm bik an ti. 6. Nau pai laia zu in hian nau chhiat theihna leh rualbanlo nau pai theihna a ti sang hle an ti. Zu hian a intu rilru a tihnut avangin pawisak a titlem a, pawikhawihna a tipung a. Chung bakah chhungkaw tlakranna a thlen thin. Tunlai hian ni tin chanchinbuah zu avanga damdawi ina lut leh thihpui an tamzia kan hmu chamchi a nih hi. Mi fing chuan mamawh thil leh duh thil a thliar hrang thiam a, a thatpui thin. Zu hi mamawh thil aiin duh thil a ni zawk awm e. Mihring pawi khawih aiin khawih loh a tha zawk a. Zu in thiam inzirtir ai chuan in lo mai tura inzirtir hi a fuh fe zawk ang. Miin sawrkar phalnaa zu a zawrh hian dan a bawhchhe lo va, mahse mihring pawi a khawih thei si. Zu zawrh hi thiang mah se chhia leh tha hriatna hmanga kalpui chi niin a lang. Miten, ‘Mizoramah chuan rorelna dik leh felna aiin zu a luang’ an ti dah reu reu ang e. Ngun taka inngaihtuah nawn turin ka ngen a che u. Rinawmin C.Sangzuala Chaltlang