1440 hi mi nung dam mekin ni khata minute kan neih zat a ni. Darkar 24 theuh. Hemi hun thuah hian mi tin kan intluk tlang. Hausa fal leh rethei bet bik awm hauh lova kan neih inzat vek awm chhun a ni. “Min duhsak lo bik, min duat lo bik, min pe tlem bik,” ti thei kan awm lo. Vui thei kan awm lo.

1440 hi engtin nge i hman? Pawisa zawnga thil chhut thiam kan ni bawk a, heti hian sawi teh ang. Ni tin Rs. 1440 hi i ATM-ah i hman tura dah luh ziah a ni. Vawiina i lak chhuah loh chuan a ral dawn tho tho. Mahse, naktukah a ngai ang chiah pek i ni leh ang. A inkhawlkhawm dawn lo thung. Vawiinah la chhuak vek la, eng atan nge i hman dawn?

Darkar engzat nge i mut? Darkar engzat nge hna i thawh? Darkar engzat nge lehkha i zir? Darkar engzat nge phone i khawih? Darkar engzat nge i tangkai?

Rilru hrisel neih nan hun hman thiam a pawimawh. Hun hmang thiam apiang an hlim a, an nun a hlawk bawk. Darkar 8 tal mu la, darkar 8 tal hna thawk rawh. Hei hi chu tih ngei tur a ni. A chiah chiah chu a harsa thei, heti vel tal hi tihna a ni. Darkar 7 mu, darkar 9 thawk pawh a awm theih e. Rajiv Gandhi kha darkar 5 a mu a, a bak chu hna a thawk an ti! Mi tin hna a dang a, kan hah dan pawh a inang dawn lo.

Darkar 8 a la chuang e. He hun la chuang hi a hmang thiam apiang an hrisel zual ta thin a ni. Sem chhin ang aw. Darkar 1 Pathian pawl nan, darkar 1 chhungkaw hun nuam, darkar 1 thiante tan, darkar 2 infiam nan, darkar 1 ngaihzawng tan, darkar 1 hahdam mai mai nan, darkar 1 chu nuam tih zawng satliah tih vel vel mai mai nante ti ta ila? Ni tin a inang chiah thei hauh lo ang a, hei aia thaa duang thiam pawh in awm ngei ang.

Minute 1440 hi Pathian min pek a ni. Naktukah min pe leh ang em? Damin kan tho leh ang em?? A petu tan darkar engzat nge i hman ve? Amah biak nan hun engzat nge i hman le?

I nun leh i hun zawng zawng petu leh neitu Pathian hnenah lawmthu sawi la. I ni tin nun minute 1440-a minute 60 chauh lek tal chu a tan dah hrang ve la, amah biak nan hmang ve ta che.

Eng anga lehkhathiam leh fing, smart leh zei pawh ni ila, Pathian ber kan ngaihsak loh chuan hlutna kan nei lo e. Nun hi a tawpah a ho tlat dawn! Pathian ngaihsak chunga mi dang tana hun hmang tangkai tam apiangte hi an hlim ber zel a nia. Mi tinin a inzat vek kan neih awm chhun, minute 1440 chu i ta, i duh anga i hman tur a ni e! Engtin nge I hman dawn le?