February 28, 1966 zan laiah India lak atanga inlakhran duh MNF in zalenna an puang a. Khatihlaia Mizo mipui tam ber khan zalenna puan hi an thlawp nghe nghe a. March 3,1966 zan atangin Aizawl lak tumin hnam sipaiten Assam Rifles an kap tan a, hetia an inkah chhung hian khawpui nula leh tlangvalin an ei leh in tur an buaipui thin nghe nghe. Silai a puah tak avang hian Aizawl a ralmuang ta lo a, chhungkaw tam takin an chhuahsan ta a. A/R ho chan a chau viau tawh a, MNF volunteer lam chuan March ni 5 zan a luh chhuah an tum tawh a. Mahse, India-in prime minister thar huaisar leh duhrum zet a lo nei hman hlauh avangin March 5,1966 atang chuan mangchhiain Zoram a tuam zui phah ta hlauh zawk a ni. March 5,1966 hi Inrinni a ni a. Aizawla Assam Rifles hmunpui lak tumin Mizo hnam sipaiten nikhat leh zan hnih an kap tawh a. Tukthuan ei kham fehreh san hun lai velin India indo thlawhna pali an lo lang thut a, an thlawh kual hnuah laipui puakrangin an rawn hawl ta bawrh bawrh mai a, bomb an thlak bawk a. MNF lamin thlawhna kahna an nei lo tih an chian hnu phei chuan an an leidote mai duh tawk loin Aizawl khawpui chu chung lam atangin an rawn phingchil a ni ber. An bomb thlak pakhat chuan Circuit House a deng a, Khatla bazar phei an kap alh zur zur a, India khan a laka hel leh a khua leh tuite pawh a thliar hrang chuang lo a, Mizo mipui kha hmelma enin a en vek a ni ber. An dopui volunteer-te chauh kha chu bei se heti em em a dem hi an hlawh lo ang. Kan economy innghahna ber Aizawl an bei chiam mai hi a rilru chhiatthlak viau, pawh a tih theih ang. Hetianga India-in a ram chhungah, a  khua leh tuite chunga jet fighter a ruai mai hi rin phak bak a ni. Vawiin thleng hian dem a hlawh phah a, a bikin a mawhphurtu ber khatih laia prime minister Indira Gandhi leh home minister G.L. Nada phei chu thangthar zel te hian an theihnghilh ngai lo ang. Tunhnai chhoah phei chuan hnam dang (vaiho) zingah langsar taka sorkar demtu an awm nual tawh, journalist lar Shekhar Gupta phei chuan Aizawl bomb-tu fighter pilot zingah khan politician lar pahnih - Rajesh Pilot leh Suresh Kalmadi te an tel a ti nghe nghe. Mizoram buaina chingfel tura Indira Gandhi kaihhruai sorkar hmalakna kha chu a uchuak mah mah a, a nunrawn thlak mah mah tih loh rual a ni lo. Parliament-ah Mizote thlavang hauhtu leh sorkar thiltih dan duh lo an awm avangin prime minister leh home minister-te hian dawt an sawi phah fo lehnghal. Pa nunnem Lal Bahadur Shastri kha la dam se chu rambuaia Mizo mipui tawrhna rapthlak takte kha a thleng lo mai thei. March 2,1966 hian Parliament-ah home minister G.L.Nanda chuan Mizoram buai chungchang statement a siam a. Sorkarin tharum thawhna thlen a phal loh thu leh hneh taka tihtawp a nih tur thu a sawi a. Senior Army officer pakhat leh Inspector General of Assam Rifles ten Aizawl an tlawh thu leh thil thleng chungchang a hmun ngei a an zir chian thu te, chumi avanga Mizo Hills District buaina chingfel tura sipai tirh an nih thu te a tarlang a. March 3,1966 zing atangin helicopter-in Aizawlah sipai phurh an nih thu te, sipai dang pawhin motor-a an pan mek thu leh (March 3) chhunah an thlen hman tur thu te a sawi bawk. Chumai a ni lo a, Mizo Hills District a buaina thleng chu tihreh a nih tawh thu te a sawi a.  Home minister statement hi a dik lo fai vek thung. A tuk (March 3,1966) a Lok Sabha-a sawihonaah Hem Barua (Assam MP) chuan home minister thuchhuah hi thu dik lo a nih thu chiang takin a sawi nghe nghe. Kum zabi 21 chhunga mahni dinchhuah eizawnna (entrepreneurship) lama hlawhtling ber pawl a ngaih CNN dintu Ted Turner chuan, "Kum 1940 chho velah khan CNN hi awm tawh se la chuan German Nazi-hoin Juda maktaduai 5 an thahna (Holocaust) kha a thleng kher lo ang," tiin a sawi a. Khawvel hriata thil thleng a nihna ang chiaha puanzar hian buaina rapthlak tak a pumpelh thei tihna a nih hmel. 1966 chho vela Mizote kan vanduaina em em chu rambuai hmetmit tura Aizawl leh Zoram hmun hrang hranga min awptu India indo thlawhnaten bomb hmanga (mipui nunau pawisawi lo thlenga) min beih thu kha hmun danga chengte hriata puangzartu kan nei lo kha a ni. Tunlai ang hian media hi chakin information inpek tawn theih chu nise thil a dang daih ang. March ni 5-a Aizawl bomb leh a hnu lama Zoram khaw hrang hranga bomb thlak chungchang te, rambuai laia sipaiho chet dan rawva tak mai te kha mi thenkhat chuan hriat reng an duh lo a, thenkhat phei chuan min awptu India thlavang an hauhna lamah kan tawrhna rapthlak takte kha an haider lui thin. Hnam tin hian an hnam pum nghawng thil thleng langsar tak tak, a chhe zawng leh a tha zawng pawhin an nei vek a, chutiang chu an theihnghilh phal ngai lo a, thangthar zelten an hriat rengna turin hmunhma te an buatsaih a, in ropui tak te an sa a, lung te an phun thin. A champha a lo thlen changin urhsun takin hriatrengna hun te an hmang thin ngai a nia. Chutihlaia, kan ram leh hnam nghawngtu langsar tak mai, khawvel ram danga thleng ngai zen zen lo leh sorkar zahawm pangngai takin an tih duh ngai miah loh mahni ram chhunga cheng, mahni khua leh tuite ngei indo thlawhna hmanga bomb nena min beih ni hi theihnghilh zia zang a ni lo. Mi tam tak chuan 5/3 hi a hriat rengna zawng zawng nen lama nuaibo vek duh mahse thangthar chhuan lo la awm zel turte hian kan theihnghilh a thiang lo a, he ni puala hun hman pawh hi tihmakmawh a ni zel ang. Chuvangin, 5/3 (March ni 5) hi he hnam hian hre reng se, he niah hian kum 1966 a thil rapthlak tak lo thleng kha hre chhuak leh thin ila, hnam rilru pu thar leh ila, thinrimna ni leh lungngaihna ni anga kan hmang duh lo a nih pawhin kan hliam hlui tuam dam dan tur ngaihtuah chungin kan tawrhna atang khan rilru thar puin i tho chhuak leh thin ang u.