Mizorama college hlun ber Pachhunga University College chuan kum 60 a tling ta. Pu H.K. Bawichhuaka, Secretary of Mizo District Council te hmalakna azarah college din turin mi thahnemngaite an insawm khawm a. October 1957 a Pu Pachhunga in a mi 20 vel kal khawm chuan, “Zoram chhunga college pakhat mah nei ve lova Silchar te, Shillong te leh Calcutta te sum tam tak seng a pan fo ai chuan Aizawlah college pakhat tal nei ve ila.. mi rethei zawk tan pawh lehka a zir theih ang a, Mizo zingah lehkhathiam kan tamin mi puitling tak tak kan inchher chhuak ang a,kan hnam hmel pawh a mawiin kan changkang hma ngei ang,” tiin College Organising Board an din ta a.   Chairman-ah Pu Pachhunga, Secretary-ah Pu H.K Bawichhuaka, Asst. Secretary ah Pu Vanhela, Treasurer ah Pu Lalhmingthanga te an ruat a. Private college a nih dawn avangin Assam University an dawr a, Guru Charan College, Silchar in exam centre hman an remti bawk a. An principal a inhawng hle a, “In zirlaite chu kan college hmingin exam vek rawh se, keiman ka lo buaipui ang,” a lo ti hial a ni. Aizawl mipui pawh an phur viau a. Chutianga phur taka an inbuatsaih mek lai chuan Bawrhsap Lawrence Singh Ingty chu an dawr ta a. An beisei loh deuhin, "Aizawl is not a fit place for college," a lo ti ta mauh mai a. An khawk chiang hle a, mahse, 'Ar talh dan chi khat chauh a awm lo' tih ang deuhin Pu Bawichhuaka chu a beidawng duh lo a, Pu Sangliana nen chuan rilru nei takin Bawrhsap chu an kawmngeih chho ta a.   Kum 1958 August thla tirah chuan Bawrhsap chuan Pu Bawichhuaka chu lengah a sawm a, beisei loh deuhin, “College kha i tan tawh ang le. Kan khawtlai luat loh nan August 15, independence day zan khian tan phawt mai ila,” a ti ta thut mai a. A lawm ngang aniang, “Ka phu chiang hle! Pu Sangliana kan ko a, kan pathum chuan rem kan ruat ta a,” tiin Pu Bawichhuaka chuan a sawi. Hun kal zelah Pu Ingty hi he college tan hian thahnem a ngai zui ta em em a, zirtirtu tur a sawm a, lehkhabu a lakhawm a, a hnu zelah pawh, “My College” ti ngatin a sawi thin. A tir te a Pu Bawichhuaka te inpekna leh Pu Ingty te, Pu Pachhunga te thahnemngaihna hi sawi hmaih rual a ni lo. He college tana thawhhlawk tak tak sawi tur an tam hle a, chung zingah chuan Bawrhsap Pu L.S. Ingty leh, Pu Pachhunga leh, Pu H.K. Bawichhuaka leh Rev. Alwyn Roberts te kha a bultumtu ‘Four Pillars of PUC’ tihtlak an ni awm e.   Governing Board an din tha leh ta a. Bawrhsap Pu Ingty chu chairman a ni a, Pu Bawichhuaka, Secretary leh Pu Lalhmingthanga Treasurer atan an ruat nghal a. Pawisa pakhat mah awm sa loin August 15, 1958 zan dar 6:00-ah, Aijal Theatre Hall-ah Mizoram a college hmasa ber AIJAL COLLEGE chu an din ta a ni. Zirtirtu tlawmngaih chhuah turte an sawm zel a, anni hian a tirah chuan hlawh nei loin zirtir hna an thawk a. Principal hmasa ber hi Father Godfrey a ni a. Zirtirtu hmasa berte chu : Rev. J.M. Llyod, Mrs. Helen Lowry, Mrs. G.R.Roberts, Pu Sangliana, Pi Rita Neihpuii, Pu J.Malsawma, Father O’ Brien te an ni. September 1,1958 ah Theatre Hall-ah class chu tan a ni ta.   He college hian kum 60 kal ta chhung khan Mizoram politics inlumlet leh mipui nunphung insingsak lai a paltlang a, hun harsa leh khirh tak tak tawng mahse Pathian hruainain hmalam panin a kal zel a ni. Sum lama harsatna an tawh laiin kum 1962-ah Pu Pachhunga hriatreng nan a nupuii Pi Chawngin Cheng sing nga (a hun laia a tam turzia hi a ngaihtuah theih awm e) college tan a pe a. A hmingah 'Pachhunga Memorial College' tih a ni ta a. Assam sorkarin kum 1964 a a lak hnuah hian ‘Pachhunga Memorial Government College’ tih a ni leh a.   Sorkar college a ni ta bawk a, sum a lo awm ta a, District Council-in ram a pek (tuna a awmnaah hian) building sak a ni a. Kum 1965-a an insawn thlak hnu lawkah ram a lo buai a, 1967 khan building thenkhat chu tuten emaw an hal hlauh mai a. UT kan lo nih khan Mizoram sorkar college a ni zui a. Kum 1979 kha he college tan kum pawimawh tak a ni. NEHU Vice Chancellor hmasa ber Devanesan khan constituent college atan dah a tiam a. Kum 1979 hian ‘Pace setting college’ (college tha filawr) ni turin NEHU in a la ta a. Hei hi ‘Deeds of Agreement’-ah pawh ziah lan a ni nghe nghe. Tichuan a hming pawh ‘Pachhunga University College’ tih a lo ni leh ta a. NEHU hnuaiah hian hmasawnna tam tak a lo thleng a. Hmarchhak biala college langsar ber pawl a ni hial a. Kum 2001-a Mizoram University a lo din khan constituent college atan a chhawm nghal a. Vawiin thlengin MZU constituent college awm chhun a ni zui ta reng a ni.   Kum 60 kal ta chhung khan he college hian hun harsa leh hun hlimawm a paltlang hnem hle a. Hma a sawn chhoh dan hi sawi sen mai chi a ni lo ang. A din tirh a subject 5 leh zirlai 58 chauh kha Diamond Jubilee kum a lo thlen meuh chuan zirlai 2400 zet awmin zirna peng (stream) 4 - Arts, Science, Commerce leh Management a awm ta a, Subject 22 lak theih a awm a. Kumin atangin Post Graduate zirna department pathum - Mizo, Philosophy leh Life Sciences ah hawn a ni bawk. NAAC accreditation A+ a ni ta hial a, tunhnai mai khan ISO certified college a ni bawk.   He college dintute zinga mi Pu H.K. Bawichhuaka khan principal nghet atan Christian missionary ngei a duh a, a duh chhan chu, “Kan College zirlaite hian Missionary nun rawn zir se la, an graduate hnuah Missionary nun nen High School-ah rawn zirtir lehchhawng se la, kan High School chhuakte chuan M.E. School-ah an rawn zirtir veleh ang a; tichuan, kan ram hi kan siam tha dawn tihna a ni,” tih a ni. Chumi hre reng chuan missionary, mi thiam chungchuang ni bawk Rev. Alwyn Roberts kha chah chhuah a ni a, he college a principal nghet hmasa ber a ni nghe nghe. Pachhunga University College hi Zofate rohlu a ni a, missionary-ten Kristian sakhaw inzirtirna bulpuia hmanga bul an lo tan a ni.   Mizorama zirna, primary school atanga high school thlenga bul tantu hi missionary-te an ni a, Mizoram zirna hi kum 1904 atanga kum 1952 thleng khan sorkarin missionary-te kutah a dah a, kum 48 chhung zet kan rama zirna kohhranin a enkawl chhung hian hmasawnna tam tak hmuh tur a awm a ni. Zirna sang (Higher education) pawh hi a bul tumtu chu kohhran ni chiah lo mah se a tir tê atangin missionary-ten an enkawl a. Aijal College (tuna Pachhunga University College ni ta) Principal hmasa ber hi Catholic Father Godfrey Danis a ni a, kum khat hnuah Presbyterian kohhran missionary Rev. J.M. Lloyd-a'n a thlak ve leh a. Chumi hnuah principal atan Welsh Presbyterian Kohhranin missionary Rev. Alwyn Roberts kha an rawn tir leh a ni.   Zorama zirna bul tantu Zosapte khan fak an phu tak zet a, zirnain hma a sawn chhohna kawng a an pawimawh zia leh kohhranin a thawhhlawk zia hi sawi uar luat a awm thei lo ang. Zosap hmasa ten kum 1894-ah Mizo hawrawp A AW B min siamsak a, ziak leh chhiar zirtirin bul an tan a, zirna in an hawng a, ni tin school an din a, middle school an din leh a. An hmalakna atangin lehkhathiam chhawr tlak eng emaw zat an lo chhuak a. A AW B kan neih atanga kum 50-na chiah, kum 1944-ah high school din a ni leh ta a. Zirna lama hmasawnna a kal chhoh mek lai chuan matric pass pawh thahnem tak an awm ta a. Chung lai chuan zir zawm zel duhte tan ram pawna chhuah a ngai a. Ram pawna college kal chu a hautak avangin matric chung lam zir zawm zel duh tan pawh kawng a ping hle.   Chutiang karah chuan mi thahnemngaiten college an lo din a, chu college chuan harsatna hrang hrang pal tlang mahse mithiam tam tak a chher chhuak tawh a, he college atang hian politician langsar tak tak te, kohhran hruaitu pawimawh tak tak te, central & state service a lut sorkar mi pawimawh tak tak te, university atanga school zirtirtu thiam tak tak te, tlawmngai pawl leh eizawnna peng hrang hranga hlawhtling tak tak te an chhuak teuh tawh bawk. Pachhunga University College hi Zoram rohlu ni zel rawh se.