Zawhna: Ka pu, mipa tleirawl kum 17 mi ka ni a, ka tilmu tuamtu vun hi a rawn bawl deuh a, a thak deuh bawk a, chuan a bawl hi a ro em em a, a na chuang lo. Eng nge hnawih ila tha ang? Chhanna: Mipa til hi a awmna lai kap hi a hnawng hma a, khawlumah phei chuan a thlan duh hle. Chutiang hmunah chuan hrik “Fungus” ang chi hi a awm hma em em mai a. Kekawrte ro tha lo leh hnawng hakte hian a awm hma viau bawk. Chu bakah chuan eng emaw tihpalh, tauh palh, hiah pilh palh te hian a vun hi a vung hma viau mai bawk a. Inbual zawhah pawh hian towel-a hruk vak vakte hian a tivung hma a, hrikin a tibuai chhunzawm mai fo bawk a ni. Til (scrotum) hrim hrim hi a vun awm dan avang hian eng emaw ho te te-ah a bawlin a thak hma zual bawk. A nazawnga damdawi hnawih te, kekawrte tawt lutuk hak te, eng emaw huat zawng neih vangtein chutiang ang chuan a awm duh hle bawk. Hrik vang ni kher lova chutiang chu awm thei a ni a, Scrotal Dermatitis te pawh an ti thin bawk. Engpawh nise, damdawi eng ang nge i lo hman tawh i sawi hran lova, i tilmuah chauh ni lovin i kapbawr hmun dangah a awm lo a nih hmel a (i sawi dawn atangin), antifungal ointment tha deuh (entirnan Cloben G ointment) zan mut dawnah pan takin, i til i silfai hnuah lo hnawih la, chuan anti-allergy damdawiah Levocetirizine (Alzero) hi mum 1 zanah lo ei bawk la, kar khat vel i hman hnu pawha a la reh loh chuan Skin Doctor te i lo entir leh dawn nia. Sawi tak angin kekawrte ro tha lo emaw hnawng deuh te ha lo la, ni sa a pho ro that chauh i ha dawn nia. Zawhna: Ka pu, Hmeichhia kum 23 ka ni a, fa 1 ka nei tawh a. Serh thak hi ka nei thin a, bawlhhlawh chhuak hi a awm thin bawk a. A rim chhia a, bawnghnute chhe rim ang deuh hi a nam thin a, khawngaih takin min puih theih chuan ka lawm ngawt ang. Chhanna: Hmeichhe hian serh tuihnang hi an nei ve hrim hrim a, chutiang Vaginal Discharge (White Blood ti te pawhin an sawi thin), a thenah chuan a rim te pawh a na hret thei bawk. Mahse serh thak i nei a, bawlhhlawh chhuak rimchhia i neih tel bawk chuan infection i nei ani thei ang. Tin, sex hman atanga kai theih natna hrik eng emaw ber i kai te pawh ani thei bawk. I zun lamah insawiselna i neih leh neih loh i rawn sawi tel lova, zunkawng infection (UTI) avang te pawhin a awm thei a, I insawiselna avang hian zunkawng a khawih tel thei bawk. Engpawh nise, zun test (Urine R/E) leh serh tuihnang culture (hrik to tir) te tih hmasak a tha viau mai. Ultrasound lo ti tel thei bawk la, i chhul hnungah tui tling a awm leh awm loh te hriat chian ni thei se. Damdawi lam chu hetiang hian ti ta ila (damdawi huat i nei lo turah ngai bawk ila): Ofloxacin emaw Cefixime leh Ornidazole inpawlh (Ornof/O2/Ornicef) mum 1 ni tin vawi 2 ni 7 tal leh serh chhunga dah chi Tab.Infa-V or Dressin hi zan mut dawnah serh chhungah dah luh tur ani a, ni 6 tal hman tur ani bawk. Hetianga i inenkawl hnuah pawh a la dam theih loh chuan hmeichhe doctor i lo pan dawn nia. I pasal pawh a insawisel tel thei a, lo zawt chiang la, insawiselna a neih a, enkawlna a dawn ve loh chuan nangmah dam mah la i nei leh thin ang. Zawhna: Ka pu, nu kum 42 mi ka ni a, ka hnungzang akham em em a, zan ka mut dawn te hian a na thin a, a chhan min hrilh theih chuan ka lawm ngawt ang. Chhanna: Hnungzang na hi a chhan tam tak a awm thei awm e. Hnathawh kaihhnawih vang te a ni thei a, taksa awm dan dik lo (body posture) te, mutna hmun (khum emaw sofa) rem lo leh dup lutuk te, rit chawi nasat lutuk te; tin, pum lam fel lo pumpui leh chaw kawng lawng vang te, mit (gallbladder) a lungte awm vang te leh, kal (kidney) a lung awm vangte a ni thei ang. Hnungzang ruh lam fel lo leh nerve lam dik lo eng emaw vang te a nih chuan X-Ray emaw CT Scan hmangtein a hriat theih ang a, ke lampang pawh a khawih tel fo bawk. Pum lam fel lohna vang anih chuan Endoscopy leh Ultrasound te tih a tul thei bawk ang.