November ni 13, 2020 khan Lalnunpuia Hrahsel lehkhabu ziah thar pahnih, MI ROPUI I NI tih leh, ISUA AU HLA tih chu Health Minister pindanah, Covid19 avanga hmai tuam chunga inhlat de dawn thuho mi tlem te hmaah tlangzarh a ni a. Chu hunah chuan a bu thlirlawkna min neihtir ve a.

MI ROPUI I NI tih bu-a thawnthu tawi pakhat kha duh zet mai ka nei a.

Mi pakhat hian thil tihpuina (fair) hmunah balloon thlawk thei a zuar a. Thil zuar e ti lo chuan a dawrtu an tlem deuh apiangin a balloon zawrh chu boruakah a chhuahtir thin a. Chumi avang chuan naupangte chuan an rawn lei duh phah thin a.

A leitu an tlem apiang chuan balloon chu a chhuah zel a. Ni khat chu a hnung lam atang hian a jacket-ah tuin emaw a rawn pawt a. A han hawi let chuan naupang pakhat hi a lo ding reng mai a, chu naupang chuan, “Ka pu, balloon dum hi chhuah ve ta la a thlawk tho ang em?” tiin a zawt a. Balloon zuartupa chuan dam diai hian, “Bawiha, a rawng vanga thlawk a ni lo a, a chhunga boruak zawkin alawm thlawhtir,” tiin a hrilh a.

He thawnthu hi ka duh ngawt mai. A ril tlat! Balloon dum chu a nalh lo si, a thlawh ve theih hmel loh riau tak asin! A sen te, a pawl te, a sendâng te, serthlum rawngte chu a nalh a, a changkan hmel a, an thlawh san duh hmel bik e! A dum chu a thing bik si! Mahse, a dum chhungah chuan a sen chhunga boruak thun ang chiah a awm chuan, a thlawk dawn khawp! A chhunga boruak awm zawkin a tithlawk miau a.

Inchei uar, hmui hmai tuaifai peih em em, mithmul lem leh mawngtam lem thlenga hmang duh khawpa pawn lam lan dan ngai pawimawhte hian chhungril takna pawimawh zawkzia hi hre tel reng ila ka duh thin ngawt mai.

Pawn lam lan dan ngaituah loh tur ka ti lo. Nalh hi a sual lo e. Pawn lam pawh nalh se, chhungril nun hi tak bawk se a tha ber.

A tak takah chuan, kan pawn lam lan dan leh rawng emaw, incheina emaw, mawng nalh leh mithmul er nalh lam hi ni loin, mihring min nawr kaltu leh kan hlutna tak tak zawk tehna tur chu a chhunga awm zawk hi a ni.

A chhunga boruak awm avangin balloon chu van sangah a thlawk tlat.

Chu chhungril rilru dik, sang taka min vawrh kang thei tur neihna thu chu i buaipui zawk teh ang u.

Pathianin Israel lal thlang tura Samuela a tirh khan, Jessaia fate zinga hmeltha pui pui leh chak hmel tak tak en kânin tleirawl ber kher kha hriak a thihtir a. “A hmel lam emaw, a san lam emaw en suh.. Lalpa chuan mihring en dan angin a en ve si lo va; mihring chuan pawn lama lam dan a en thin a, Lalpa erawh chuan thinlung lam a en zawk thin a ni,” a ti mai.

Chhungril thinlung dik leh changkang hi a ni, leia kan nun chhunga nun changkang min neihtirtu tak tak zawk tur chu! Thinlung dik hi a ni, van sang taka min hruai a, vanram nun min chentir thei tur zawk chu!

Sang taka min thlawhtir ve thei boruak hi kan kawchhungah a awm em?